Në këto ditë vere në doganën e Barit, ku shtohet në mënyre të ndjeshme qarkullimi i pasagjerëve dhe automjeteve drejt dhe nga Shqipëria, nuk ndalet aktiviteti i forcave të rendit.

Diten e mërkurë në një autobus të sapozbritur nga trageti "Adriatica", u zbuluan gati 600 flakone Vitadox; një medikament natyror i nxjerrë nga helmi i një lloj akrepi, shitet si mjekim kundër disa lloj tumoresh. Ky ilaç është i ndaluar në Itali dhe në shtete të tjera europiane, por shitet lirisht në Shqipëri, i importuar nga Kuba ku edhe prodhohet.

Sipas faqes zyrtare të Pharmamatrix çmimi në Shqipëri, është 145 euro për 30 miligramë. Kapja e kësaj sasie të madhe të këtij medikamenti të ndaluar, u përshëndet nga Luigi d'Ambrosio Lettieri, sekretari i Komisionit për Shëndetësinë prane Senatit Italian.

Ai kujtoi se deri me sot, "pranë Agjencisë Italiane për Produktet Farmaceutike nuk eështë paraqitur asnjë kërkesë për marrjen e autorizimit dhe se në nivel nderkombëtar nuk ekzistojnë studime shkencore që të vërtetojnë efikasitetin e kësaj substance", citon Top-Channel.

E megjithatë kjo nuk ndal ata që shkojnë në Shqipëri posaçërisht për të blerë këtë medikament, të shtyrë nga shpresa dhe dëshpërimi. /albeu.com/