Tentoi të vriste vjehrrën dhe nipin e saj në Vlorë, ish-dhëndri nga Kosova ende në kërkim, në pranga bashkëpunëtori

Policia e Vlorës ka shpallur në kërkim ish-dhëndrin e të moshuarës në Vlorë, e cila u dhunua fizikisht bashkë me nipin e saj 14-vjeçar dje në banesën e saj në Vlorë nga ish-dhëndri Haki Bajrami dhe bashkëpunëtori i tij Gëzim Bacaj.

Ky i fundit u arrestua sot në doganën e Morinës, në temtativë për tu larguar nga vendi ynë. Gëzim Bacaj në bashkëpunim me Haki Bajramin kanë dhunuar 70 vjeçaren Luftie Fanajn dhe nipin e saj 14 vjeçar.

Ndërsa po punohet për gjetjen e ish-dhëndrit nga Kosova Haki Bjarami.

Gjithashtu policia bën me dije se ka arrestuar edhe një peron tjetër. Bëhet fajlë për Durim Klemendi, pasi nuk kallëzoi kriminin.

Ngjarja e rëndë raportohet të ketë ndodhur pasi Haki Bajrami kishte dy muaj që ishte ndarë nga gruaja e tij, e ëma e 14 vjeçarit, e cila kishte ikur në Gjermani.

I mituri ditën e djeshme tregoi se si ish njerku i tij e kishe dhunuar atë dhe gjyshen e moshuar si dhe më pas i kishte vënë flakën banesës.

Njoftimi i polici

Tentuan të vrisnin një shtetase të moshuar dhe nipin e saj të mitur, duke i dhunuar fizikisht dhe duke i lënë pa ndjenja në banesën e tyre, të cilës më pas i vunë qëllimisht zjarrin, kapet dhe vihet në pranga 42-vjeçari nga Kosova, shpallet në kërkim bashkëautori tjetër (gjithashtu nga Kosova).

42-vjeçari u kap në PKK Morinë, në tentativë për t’u larguar nga vendi ynë. Vihet në pranga edhe një shtetas tjetër kosovar, pasi dyshohet se duke patur dijeni për këtë krim, nuk e kallëzoi atë.

Shërbimet e Komisariatit të Policisë Vlorë, menjëherë pas marrjes së njoftimit se në fshatin Llakatund, Vlorë, dyshohet se për motive të dobëta, 2 shtetas kishin dhunuar fizikisht një 70-vjeçare dhe nipin e saj 14-vjeçar, dhe më pas kishin tentuar t’i vrisnin ata, duke i vënë zjarrin banesës ku këta 2 shtetas gjendeshin pa ndjenja, kanë organizuar punën për lokalizimin, kapjen dhe nxjerrjen përpara përgjegjësisë penale të autorëve të këtij rasti.

Falë veprimeve të shpejta operacionale të Policisë së Vlorës, si dhe koordinimit të informacionit dhe punës policore me shërbimet e PKK Morinë, u kap në Morinë, në tentativë për t’u larguar drejt Kosovës, njëri prej autorëve të dyshuar, shtetasi G. B., 42 vjeç, banues në Kosovë. Gjithashtu për këtë rast, u vu në pranga shtetasi D. K., 32 vjeç, banues në Kosovë (shoqërues i shtetasit G. B.), i cili dyshohet se duke patur dijeni për këtë krim, nuk e kallëzoi atë.

Në vijim të veprimeve procedurale, u shpall në kërkim autori i dyshuar kryesor i kësaj ngjarjeje, shtetasi H. B., 51 vjeç, banues në Kosovë. Vijon intensivisht puna për kapjen e tij.

Si rezultat i veprimeve hetimore paraprake, bazuar dhe në kallëzimet e shtetasve të dëmtuar, dyshohet se shtetasit H. B., në bashkëpunim me shtetasin G. B., kanë tentuar të vrasin shtetasen e moshuar dhe nipin e saj të mitur (ish- vjehrra dhe thjeshtri i shtetasit H. B.), duke i dhunuar ata dhe pasi i kanë lënë pa ndjenja, i kanë vënë qëllimisht zjarrin banesës ku ndodheshin këta 2 shtetas.
2 shtetasit e dëmtuar kanë mundur të dalin nga banesa që ishte duke u djegur dhe aktualisht ndodhen në spital, në kujdesin e mjekëve. Si pasojë e zjarrit është djegur banesa e shtetases së moshuar dhe është dëmtuar pjesërisht një banesë tjetër e pabanuar, aty pranë.

Materialet procedurale i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme, për veprat penale “Vrasja në rrethana të tjera cilësuese ndaj një të mituri dhe kundër dy ose më shumë personave”, mbetur në tentativë dhe “Shkatërrimi i pronës me zjarr”, të kryera në bashkëpunim, në ngarkim të shtetasve H. B. dhe G. B., si dhe “Moskalllëzimi i krimit”, në ngarkim të shtetasit D. K./albeu.com/