Shqipëria bllokon Samitin e Procesit për Bashkëpunim në Evropën Juglindore që po vijon në Beograd të Serbisë.
Fakti që Deklarata e Samitit nuk përfshin çështjen e Kosovës dhe qëndrimet e BE-së lidhur me të, ka bërë që Shqipëria të refuzojë firmosjen e saj dhe Samiti të ndërpresë punimet për një kohë të pacaktuar.

"Shqipëria nuk mund të pranojë këtë draft-rezolutë për shkak se nuk përmendet rezoluta e Budvës, si dhe rëndësia e marrëveshjes që është arritur tashmë dhe është zbatuar. Ajo që kërkojmë është që rezoluta në këtë segment të jetë në pajtim me qëndrimet e BE-së", ka thënë përfaqësuesi i Shqipërisë.

Kryesuesi i Samitit, ministri i Jashtëm serb, Vuk Jeremiç ka thënë se: "Samiti mund të përfundojë edhe pa pasur deklaratë".

Në samitin e sotëm, Maqedonia mori kryesimin e radhës me Procesin për Bashkëpunim në Evropën Juglindore. /albeu.com/