Reshjet e shiut dhe përmbytja kanë pushtuar Greqinë. Sipas mediave greke, Korfuzi ka shpallur gjendjen e jashtëzakonshme për shkak të motit të keq që ka përfshirë ishullin.
Lajmi u konfirmua dhe nga kryetari rajonal i Njësisë së Korfuzit, Costas Zorbas.
Trafiku i automjeteve është devijuar në disa zona si ajo e Vryonit për ata që shkojnë drejt Korfuzit jugor, si dhe zona e Mesonghit për ata që lëvizin drejt Korfuzit qendror.
Problemet në rrjetin rrugor rajonal vërehen edhe në zonën e Kynopiaston në Korfuzin e Mesëm.
Në të gjitha pikat “e rrezikshme” të rrjetit rrugor, janë marrë masa emergjente nga Policia Rrugore, ndërsa Mbrojtja Civile u rekomandon drejtuesve të mjeteve që t’i kushtojnë vëmendje të veçantë dhe të ndjekin udhëzimet e policisë.
Ministri i Mbrojtjes Civile, Christos Stylianidis njoftoi se është nisur për në Moraitika për t’i ardhur në ndihmë qytetarëve të bllokuar për shkak të përmbytjeve të mëdha.
