"ZGJOHU" reagon për heqjen e flamurit
Lëvizja Qytetare ZGJOHU! dënon ashpër largimin e flamurit kombëtar shqiptar nga shtyllat e rrugëve dhe shesheve të Prishtinës që ishte vendosur përkrah flamurit të përkohshëm të Kosovës dhe atij amerikan në nderim të vizitës së Sekretares amerikane të Shtetit, Hillary Clinton.

“ZGJOHU! përkujton autoritetet vendore se bekimi amerikan për pavarësinë e Kosovës u dha nga ish presidenti Amerikan Xhorxh W. Bush nga qendra e Tiranës gjatë vizitës së tij në Shqipëri dhe këtë deklaratë ai e bëri duke qëndruar pranë flamurit tonë kombëtar që po e stoliste gjithë Tiranën”, deklaroi kryetari i kësaj lëvizje, Artan Grubi.

Sipas tij, përpjekjet për shpërlarje kolektive të trurit të qytetarëve shqiptar të Kosovës janë të destinuara të dështojnë dhe apelojmë deri te autoritetet e Kosovës që mos të provokojnë rëndë gjithë popullin shqiptar për një vardisje të kotë çasti.

Flamuri kombëtar shqiptar, i cili ishte vendosur pranë flamujve shtetërorë të Republikës së Kosovës dhe Shteteve të Bashkuara të Amerikës, është hequr sot gjatë orëve të pasdites nga rrugët e Prishtinës.

Nuk ka ende një shpjegim se përse flamuri kombëtar i shqiptarëve u hoq nga rrugët.
Shtuar më 12/10/2010, ora 20:26

Shkruani komentin tuaj!
Të fundit nga kjo kategori