Zgjidhen nënkryetarët e rinj të PDSH-së
Kuvendi qendror i PDSH-së ka zgjedhur kryesinë e re partiake. Ai mbrëmë ka zvogëluar numrin e kryesisë, ndërsa ditën e sotme mësohet se do të japin hollësi të mëtejshme lidhur me vendimet e tij.

Ajo që është bërë e ditur janë nënkryetarët e rinj të kësaj partie Ernad Fejzullahu dhe Miat Sadiku. Në këtë mbledhje u zgjodh edhe sekretari i përgjithshëm, emri i të cilit ende nuk është bërë me dije. Jozyrtarisht mësohet se nuk përjashtohet kryetari aktual i komunës së Strugës, Ziadin Sela, njofton INA.

“Do të zvogëlohet numri i organeve të partisë, shkaku se kemi ardhur në përfundim se sa më i madh numri i organeve të partisë aq më vështirë lëvizin këto organe. Do ketë me siguri një lëvizshmëri më të madhe një ruajtje më të madhe të diskrecionit brenda partisë shkaku se, ne për fat të keq jemi një parti e cila vepron në një shtet ku shteti me gjitha instrumentet e veta vepron kundër kësaj partie duke filluar nga informimi e deri te shërbimet sekrete që mundohen ta prishin këtë parti”, deklaroi Menduh Thaçi, kryetar i PDSH-së.

Në këtë mbledhje janë shkarkuar nga postet partiake të nënkryetarit dhe sekretarëve Imer Aliu, Bekim Fazliu, Vlera Ejupi dhe emra të tjerë të kryesisë, duke u freskuar me emra të rinj. Kryesia e re do të përbëhet nga 13 anëtarë nga 33 anëtarë sa kishte deri tani./albeu.com/
Shtuar më 09/06/2013, ora 11:03

Shkruani komentin tuaj!
Të fundit nga kjo kategori