Ish-kryeministri Sali Berisha i ka kthyer përgjigje Enkelejd Alibeajt, i cili sot mblodhi Grupin Parlamentar. Sipas Berishës, ai sot dështoi dhe më pas doli duke folur për mediat si ministër i Ramës.
Berisha është kundër idesë, që deputetët janë të ndarë në tre grupime, pasi pretendon se ata që nuk morën pjesë në Kuvendin e 30 prillit janë në meditim dhe shumë shpejt do ti bashkohen shumicës opozitare.
“Dështoi plotësisht, nuk realizoi asgjë në mbledhje, deputetët ja kundërshtuan qëndrimet dhe doli sikur të ishte një ministër i Edi Ramës.
Nëse ju keni konceptin e partisë, partia ka forume dhe përfaqësohet nga forumet e zgjedhura të saj. Çdo deputet ka në parti një vend anëtar kryesie në degën nga e cila ka ardhur.
Nuk është e vërtetë që deputetët janë në tre grupe. Ata janë deputet të PD-së dhe të jesh i sigurt që të gjithë do jenë në aktivitetet e PD.
Janë akoma në meditim, por vendi i tyre është tek shumica. Erdhën sot në atë takim që nuk arriti dot kuorumin, ai dështoi. I bindur jam se progresivisht deputetët do të jenë tek shumica. Unë kam besim në botëkuptimin e tyre politik.
