Veprim joligjor, e kanë cilësuar nga Bashkësia Fetare Islame (BFI) vlerësimin e ministres për Punë të Brendshme, Gordana Jankullovska, se një pjesë e të arrestuarve në aksionin "Monstër" janë "radikalë islamikë".

Në konferencën për shtyp të mbajtur sot enkas për zhvillimet e fundit, nga BFI apelojnë për maturi, arsye dhe drejtësi, duke përkrahur çdo veprim që do të çonte në zbulimin e dorasëve të vërtetë të vrasjes së pesëfishtë në fshatin Smillkovcë.

"Ne jetojmë në shoqëri shumëkonfesionale dhe shumënacionale dhe kalojmë nëpër momente shumë të ndjeshme dhe për atë shkak është e nevojshme të sundon mendja e shëndosh, ndershmëria dhe drejtësia. I përkrahim përpjekjet që të gjinden vrasësit dhe të gjithë të japin përgjegjësi për veprën e tyre në përputhje me ligjin. Deklarimet publike të Ministrisë kompetente, për një pjesë nga grupi i të arrestuarve se janë radikalist islamik, para se të argumentohet statusi i tyre në bazë të vendimit gjyqësor, paraqet gjithashtu një veprim joligjor", thonë nga BFI.


Më tej, nga ky institucion i lartë fetar vërejnë se literaturat fetare nuk mund të jenë argument kundër të arrestuarit dhe pyesin se prej kur "posedimi i Kuranit dhe literaturës fetare qenka vepër penale dhe me cilin ligj myslimanëve u ndalohet që në shtëpitë e tyre të mbajnë Kuran dhe literaturë fetare". /albeu.com/