Rilindja Demokratike Kombëtare do të mbajë sot në Tetovë Kongresin e saj për të zgjedhur strukturat e larta partiake, plot një vit pas themelimit të saj.


RDK si partia më e re e shqiptarëve në Maqedoni, e kryesuar nga kryetari aktual i komunës së Gostivarit, Rufi Osmani arriti që në zgjedhjet e fundit parlamentare të fitojë dy deputetë.

Kongresi fillon në mesditë duke vijuar me zgjedhjen e kryesisë së punës, fjalimin e liderit Rufi Osmani si dhe fjalimet e mysafirëve. Në Kongresin e kësaj partie si mysafirë janë konfirmuar lideri i Vetëvendosje!, Albin Kurti, lideri i LDK-së Isa Mustafa, përfaqësues të AAK-së, përfaqësues të partive politike në Maqedoni, ndërsa nga Shqipëria është konfirmuar prania e përfaqësuesve të lartë të PD, PS, LSI dhe partive tjera. Në kongres do të jenë të pranishëm edhe kryetarët e komunave të Ulqinit dhe Bujanocit, kori diplomatik, por edhe miq të tjerë nga diaspora.

Në këtë kongres të parë do të bëhet zgjedhja e kryetarit të RDK-së, zgjedhja e anëtarëve të Kuvendit Qendror të RDK si dhe zgjedhja e anëtarëve të Këshillit mbikëqyrës të RDK-së.

Kongresi vjen në një kohë kur të gjitha partitë politike po bëjnë përgatitjet e fundit për zgjedhjet e ardhshme lokale. /albeu.com/