Astrit Patozi ka deklaruar se nëse Berisha tërhiqet nga aksioni i tij politik, atëherë PD do të gremiset edhe më keq. Në emisionin “Opinion”, ai tha se Foltorja, e cila u nis prej tij është një kostum i prerë vetëm për ish-kryeministrin.
“Unë Berishës i këshilloj të vazhdojë, sepse e gjithë kjo, Foltorja është një kostum i prerë për Berishën, jo për dikë tjetër dhe nëse ai tërhiqet PD do të gremiset edhe më keq. Në 7 Mars duhet të vendoste do shohë interesin tim apo të PD. Ai pa të vetin, zgjedhje e tij vazhdoi eci drejt”, tha Patozi.
Megjithatë, ai shtoi se ndonëse me Berishën PD mund të jetë më luftarake, ajo nuk do të ketë perspektivë për t’u bërë më e madhe.
“Foltorja dhe kuvendi i fundit është një manifestim i pafund i kryetarokracisë. PD me Berishën, për mua është një parti më e vogël, më e vjetër, por mund të jetë më luftarake, më e organizuar dhe më solide. Por gjithmonë në opozitë, pa perspektivë për t’u bërë më e madhe”, tha Patozi.
