Sela falenderon Labënishtin dhe apelon te struganët
Kandidati shqiptar për kryetar të komunës së Strugës, në rrëthin e dytë zgjedhor, Ziadin Sela, në një takim më gazetarë, faleminderoi qytetarët e Strugës për maturinë e treguar në ditën e zgjedhjeve dhe njëkohësisht apeloi te votuesit, që në të njejtën mënyrë, të civilizuar dhe të qetë, në mënyrë sa më masive të dalin të votojnë edhe më 7 prill.

Ai gjithashtu, përgëzoi edhe kundërkandidatin e tij në rrethin e parë, Arben Labënishti, për gjestin demokratik që bëri pas përfundimit të zgjedhjeve.

"Fillimisht dua të faleminderoj të gjithë qytetarët e Strugës për angazhimin maksimal që e dhanë më 24 mars, që mbi të gjitha zgjedhjet të jenë të qeta dhe demokratike. Ju faleminderoj që në mënyrë të civilizuar dhe kulturuar shprehët vullnetin tuaj dhe në të njëjtën kohë ju faleminderoj për përkrahjen që më dhatë si kandidat, që përkrahët programin tonë politik. Në të njëjtën kohë shfrytëzoj rastin që të faleminderoj kundërkandidatin tim për gjestin demokratik që bëri menjëherë atë natë sapo përfunduan zgjedhjet, i cili më uroi fitoren dhe në të njejtën kohë premtoi se bashkërisht do të angazhohemi në fushatën për raundin e dytë, që poashtu të qetë dhe në mënyrë të civilizuar të rezultojë në shprehjen e vullnetit të shumicës, që do të thotë fitoren time si kandidat dhe me këtë fitoren e të gjithë qytetarëve të Strugës. Natyrisht që Programi ynë mbetet i pandryshueshëm dhe është gjithëpërfshirës për të gjithë qytetarët e Strugës, pa marrë parasysh përkatësisë politike, etnike apo fetare. Kur jemi te programi, dua të shpreh edhe një mesazh tek popullata, sidomos tek oponentët politik dhe t’ju them se mbi të gjitha demokracia është shprehje e vullnetit të shumicës. Shumica në Strugë dihet se kush është dhe prandaj çdo tendencë për të prishur këtë vullnet të shumicës, nuk i shërben demokracisë. Do të doja t’i drejtoja një apel faktorit ndërkombëtar, që të angazhohen në raundin e dytë të zgjedhjeve lokale, të japin angazhim maksimal në mënyrë që të pengojnë shantazhimet, kërcënimet, blerjen e votave, të cilën oponentët tonë tani në raundin e dytë kanë nisur ta bëjnë me të madhe. Në të njëjtën kohë shfrytëzoj rastin që t’ju jap një mesazh të gjithë qytetarëve, të dalin në mënyrë sa më masovike, në mënyrë të civilizuar dhe të qetë, të ruajnë gjakftohtësinë dhe mos bëhen preh e provokimeve dhe që më 7 prill, të gjithë bashkë të fetojmë. Do t’a përsëris edhe njëherë, unë do të jem kryetar i të gjithë qytetarëve të Strugës. Është koha që që ëndrrën tonë ta realizojmë tani, për Strugën, për ne dhe fëmijët tanë",theksoi Sela para gazetarëve.

Në pyetjen e gazetarëve se bashkëpunimi ndërmjet Selës dhe Labënishtit, do të jetë vetëm dekorativ apo të dy bashkë do të dalin para qytetarëve që të bëjnë fushatë, Sela u përgjigj se ai është i gatshëm që bashkë me Labënishtin të dalin publikisht dhe të punojnë në emër të interesit të përbashkët.

"Unë jam i gatshëm që të jemi bashkë edhe në takimet me qytetarë. Natyrisht që unë shpresoj që bashkë do të jemi edhe nëpër takime sepse interesi është i përbashkët", u shpreh Ziadin Sela, kandidati shqiptar për komunën e Strugës. /albeu.com/
Shtuar më 30/03/2013, ora 17:36
Shkruani komentin tuaj!
Të fundit nga kjo kategori