Ministri i Ekonomisë, Valon Saraçini, ka vizituar dje Komunën e Likovës për tu informuar rreth ndërtimit të hidro-elektranës në ujërat e lumit të Brezës afër pendës së Gllazhnjës, njofton Gazeta Koha.

"Qëllimi i vizitës sime në rajonin e Likovës është që të shoh se deri ku kanë arritur aktivitetet për ndërtimin e minihidroelektranës në ujërat e Karadakut, respektivisht në lumin e Brezës. Bëhet fjalë për një investim prej 1.5 milion euro. Nga ekzekutorët e punëve u njoftuam se hidroelektrana do të përfundojë deri kah muaji gusht, ndërsa në shtator mund të pritet prodhimtaria e sasive të para të energjisë elektrike. Një aktivitet i këtillë ka ndikuar në punësimin e rreth 20 vetave. Por, ajo çka është më me rëndësi, ky rajon do të ketë rrjet stabil të energjisë elektrike, por edhe do të krijohen edhe kushte më të mira për ambientin jetësor, për zhvillim ekonomik dhe në përgjithësi kushte më të mira për jetesë. Gjithashtu, me këto investime që po bëhen në këtë anë, po krijohen kushte më të mira edhe për investime të tjera", tha ndër të tjera ministri i Ekonomisë, Valon Saraqini gjatë qëndrimit në rajonin e Likovës. /albeu.com/