Regjistrimi, shqiptarët nuk lëvizin nga kërkesat
Përkundër ndryshimeve në ligjin për regjistrimin e popullsisë dhe ekonomive familjare, anëtarët shqiptarë dhe turq të Komisionit Shtetëror për Regjistrimin e popullsisë këmbëngulin në kërkesat e tyre që struktura e trupave regjistrues të reflektojnë përbërjen etnike të Komunave, që reflekton përfaqësimin e drejtë dhe adekuat në rrafshin lokal.

Nënkryetari i Komisionit Abdylmenaf Bexheti tha për Alsat se, nëse nuk do të arrihet të tejkalohen dallimet, anëtarët shqiptarë dhe turq do të kërkojnë interpretim autentik të ligjit për regjistrimin e popullsisë.

“Anëtarët shqiptarë kërkojnë që në përputhje me interpretimin autentik të ligjit që ne e bëjmë që në asnjë mënyrë të mos prejudikohet që domosdo ne të kemi tutor domosdo prej palës tjetër, sepse ajo është një shprehje e mosbesimit, e dyta është një situatë praktike e pamundshme sepse shqiptarë nuk mund të çojmë të regjistrojnë në Dellçevë dhe Berovë dhe të sjellim maqedonas të regjistrojnë në Bozovcë, apo Shipkovicë, apo Likovë.

Në Komunat ku i kemi të përziera, përpjestimisht me atë përzierje të bëhen, në Komunat që janë të pastra etnike, ashtu të jenë si për njërën palë ashtu edhe për palën tjetër dhe çdo formë tjetër mendoj se nuk mund të funksionojë” , tha Abdylmenaf Bexheti, Nënkryetar i Komisionit.

I pyetur se cilat janë gjasat që procesi i regjistrimit të popullsisë të prolongohet, nënkryetari i Komisionit Shtetëror për regjistrimin e popullsisë, Abdylmenaf Bexheti tha se ajo çështje i takon politikës, por tha se është më mirë që të ketë zgjidhje të problemit se sa prolongim të regjistrimit.“Politika është ajo që duhet të vendos më në fund se a mund të prolongohet dhe nëse mund, kur mund ta bëjë atë, por nuk e shoh unë problemin tek prolongimi i vazhdueshëm pra më mirë është zgjidhja e problemit sot se sa prolongimi i vazhdueshëm i saj. Unë vetëm një gjë e di se së paku në atë përbërje ashtu siç propozojnë ata, tek pjesa shqiptare kjo nuk do të akceptohet asnjëherë”, tha Abdylmenaf Bexheti, Nënkryetar i Komisionit.

Askush nga BDI-ja nuk u prononcua lidhur me reagimin e anëtareve shqiptar të komisionit apo për zërat lidhur me arritjen e marrëveshjes me VMRO-DPMNE-në për këtë çështje. Sipas ligjit aktual për regjistrimin e popullsisë, që u miratua në mars të këtij viti, procesi i regjistrimit të popullsisë do të mbahet nga 1 deri 15 tetor të këtij viti. alsat-m

Shtuar më 08/08/2011, ora 18:23

Shkruani komentin tuaj!
Të fundit nga kjo kategori