Rasti Monstra mbyllet për publikun
Seanca e rastit “Monstra” në Gjykatën Penale të Shkupit vazhdon pa praninë e gazetarëve, familjarëve të të akuzuarve si dhe përfaqësuesve të organizatave të ndryshme pasi që do të nxirren provat nga Masat e veçanta hetuese të cilat i ka dorëzuar policia.

Sipas Ligjit për Procedurë Penale, opinioni nuk mund të jetë i pranishëm në këto seanca ku do të nxirren prova të klasifikuara, gjegjësisht materiale të përgjuara – biseda telefonike dhe SMS porosi. Këto materiale janë nga procedura e vjetër hetimore dhe nuk kanë të bëjnë me materialet që pretendohet t’i posedojë Prokuroria Speciale nga “bombat” .

Në seancë po qëndrojnë të akuzuarit, avokatët e tyre, bashkë me familjarët e të vrarëve dhe përfaqësuesit e tyre ligjor, avokatët.

Nuk dihet se sa do të zgjasë seanca, ndërkaq sipas Ligjit për Procedurë Penale, ata të cilët po qëndrojnë në seancë nuk kanë të drejtë të tregojnë se çfarë prova janë nxjerrë para të pranishmëve.

Seanca e radhës do të mbahet më 4 shkurt, e cila gjithashtu pritet të jetë e mbyllur për opinionin pasi që sipas paralajmërimeve do të vazhdohet me provat nga Masat e veçanta hetuese.

Ndryshe, gjatë seancës së kaluar, i akuzuari Fejzi Aziri nuk u nda i kënaqur me përgjigjet nga ekspertët e balistikës nga Ministria e Punëve të Brendshme dhe Mjekësisë Ligjore të cilët kanë kryer ekspertiza në lidhje me atë se si janë vrarë pesë personat në Liqenin e Smillkovës më 12 prill të vitit 2012. Prokuroria disa herë u ankua te gjykatësi që mbrojtja të mos i komentojë përgjigjet e ekspertëve, ndërkaq avokatët e palës mbrojtëse thanë se në ekspertiza qëllimisht janë bërë lëshime.
Shtuar më 17/01/2019, ora 11:36
Shkruani komentin tuaj!
Të fundit nga kjo kategori