Reshjet e dendura të shiut kanë shkaktuar përmbytje në disa zona të Maqedonisë. Nga reshjet e shiut dhe vërshimet e lumit të Radovishit, janë rrënuar dy ura në dy vendbanime rurale, që lidhin rrugën magjistrale Strumicë – Shtip. Mbi 1.500 banorë të një fshati Zleovo kanë mbetur të ngujuar si pasojë e reshjeve dhe vërshimeve, por edhe rrënimit të urës që lidh rrugën e tyre me vendbanimet e tjera. Në një fshat tjetër Oraovicë të Radovishit, vërshimet e rrëmbyeshme kanë bartur edhe mjetet të rënda, përfshirë edhe një makinë, ndërsa janë shkaktuar dëme të mëdha të të mbjellurave.

Aksi rrugor Makedonska Kamenicë – Dellçevë është bllokuar për makinat, për shkak të shembjes së dheut.

Vërshime masive edhe në rajonin e Kumanovës, me ç’rast nga dalja e shtratit të lumejve Pçinjë, Kriva Reka, Kumanovarja, etj, janë vërshuar disa vendbanime të qytetet dhe zonat periferike. Në lagjen Sredorek janë vërshuar 60 shtëpi, ndërsa niveli i lumit ka mbërritur në dy metra. Vërshime të tokës janë regjistruar edhe në fshatrat Llopat dhe Opajë, por edhe në pjesën periferike të qytetit ku rrjedh lumi Pçinja.

Vërshime janë regjistruar edhe në zonën e Pollogut, me ç’rast QMK pritet të jap detaje më të hollësishme mbi gjendjen e krijuar. /albeu.com/