Burime pranë Qeverisë kanë bërë të ditur se BDI dhe VMRO-DPMNE javëve të fundit pritet të realizojnë fazën e fundit të punësimeve të aktivistëve të tyre. Partitë e koalicionit kanë arritur marrëveshje për realizimin e punësimeve masive në prag të zgjedhjeve të parakohshme parlamentare.

“Ka informacione se do të realizohen këto punësime në prag të zgjedhjeve, pasi që janë dhënë premtimet që duhet të realizohen para aktivistëve partiak. Besojmë se në shumë ministri po përgaditen vendet e punës, të cilët do të duhet të marrin dritën jeshile nga Ministria e Financave”, bëjnë të ditur burimet qeveritare.

Edhe në takimin e djeshëm midis kreut të BDI-së Ali Ahmeti dhe kryeministrit Nikolla Gruevski, Ahmeti ka kërkuar që Ministria e Financave të miratojë vendime sa i përket punësimeve të reja.

Ndërkohë, Sekretariati për implementimin e Marrëveshjes së Ohrit pritet që gjatë kësaj faze të shfrytëzojë kuotën e përcaktuar për 600 punësimet e parapara për këtë vit në bazë të buxhetit.

Mediat maqedonase kanë bërë të ditur për punësime masive edhe të VMRO-DPMNE-së në Ministrinë e Brendshme, të Bujqësisë dhe institucione të tjera. /albeu.com/