Ndërpritet greva e urisë në burgun e Manastirit
Është ndërprerë greva e urisë në burgun e Manastirit. Dy nga tre të burgosurit janë transferuar në burgjet e Shkupit dhe Kumanovës. Gjatë ditës së sotme pritet që edhe i burgosuri i tretë të transferohet, njofton Tv21.

“Nga drejtoria për zbatimin e sanksioneve ende nuk është dorëzuar informacion me shkrim deri tek avokati i popullit, megjithatë, gjatë kontakteve me drejtorinë e burgut në Manastir, morëm informacion se dy persona tashmë janë transferuar në institucionet ndëshkues-korrektues, njëri prej tyre në vendin e tij banimi, ndërsa i burgosuri tjetër afër vendbanimit të tij”, tha Liljana Ilievska, zyra e Avokatit të Popullit, Manastir.

Tre të burgosurit një kohë më të gjatë kanë dorëzuar kërkesa deri te drejtoria për zbatimin e sanksioneve, por prej atje ua kanë refuzuar të njëjtat. Për kërkesën e fundit, fare nuk u janë përgjigjur.

“Që të tërheqin vëmendje dhe azhurnim gjatë procedurës së drejtorisë për zbatimin e sanksioneve, ata vendosën të mbanin grevë. Në bisedën me ata, njëri nga të burgosurit theksoi se në qoftë se nuk i përgjigjen edhe kësaj kërkese, ai është i gatshëm që të ndërmarrë hapa më radikale duke lënduar veten”, tha Ilievska.

Rexhep Memishi është një nga të burgosurit i cili në telefon dha deklaratë për TV21. Ai u ankua se në mënyrë të padrejtë mbahet në burgun komunal, për shkak se është dënuar me 7 vjet burg.

“Për dënim prej shtatë viteve po e vuaj dënimin në këtë burg që është burg komunal. Nuk ka kushte për dënimet që zgjasin shtatë vjet. Andaj do ju lusja që të dërgoni kërkesë deri tek avokati i popullit të Maqedonisë, që të vijë të na vizitojë”, tha Rexhep Memishi, i burgosur në burgun e Manastirit.

Pas kronikës së publikuar, Memishi është transferuar në Kumanovë.

Tre të burgosurit grevën e urisë e nisën të premten. Ata u ankuan për kushtet e këqija në burg, për torturë dhe diskriminim në bazë religjioze. Burgu në Manastir ka kapacitet për 60 persona në repartet për burgim dhe 22 persona në repartet për paraburgim.


Shtuar më 05/04/2018, ora 11:40
Shkruani komentin tuaj!
Të fundit nga kjo kategori