Avokati i të dyshuarve shqiptarë në operacionin "Monstra", Naser Raufi tha se dje ka marrë vendimin për shtyrjen e paraburgimit edhe për 30 ditë, vendim i cili nga gjykata është vendosur më datë 29 të muajit të kaluar, njofton Zhurnal.

"Vendimi është marrë në bazë të nenit 199 të Ligjit për procedurë penale, me çka paraburgimi është vazhduar në pikën një, dy dhe3 të këtij neni. Në pikën një thuhet që arsyet e masës për shtyrje të paraburgimit bëhen që të akuzuarit të mos ikin, Pika dy bazohet në atë që nuk është mbaruar hetimi dhe ende është aktiv dhe pika tre që të mos përsëritet delikti. Ky është vazhdimi i tretë i paraburgimit dhe ende s’ka prezantim të asnjë prove", tha Naser Raufi, duke shtuar se e gjithë puna po ngec tek Prokurori dhe tek gjykatësi hetues për shkak se nuk kanë kryer punën e tyre me provat të cilat i kanë marrë nga Ministria e Punëve të Brendshme /albeu.com/.