Marrëveshja e Prespës mbërrin në Kuvendin e Greqisë

Zhvillimet politike në Greqi ndodhen në pikën më kulmore të tyre, pasi marrëveshja e Prespës është çuar në parlamentin grek mesditën e së shtunës për t’iu nënshtruar proceseve përkatëse deri në miratimin e saj në fundjavë.

Kryeministri grek Aleksis Cipras ka siguruar opozitën e konservatorëve se do të jetë i hapur dhe i duruar në gjithë proceset parlamentare që do të kalojë kjo marrëveshje e nënshkruar nga ai dhe Zoran Zaev, qershorin e kaluar, e cila i ka dhënë fund një konflikti gati 30-vjeçar midis dy vendeve.

Marrëveshja pritet në fillim të marrë aprovimin e kryetarëve të grupeve parlamentare, më pas të komisionit në parlament dhe në fund të shumicës absolute.

Ndërsa opozitarët e Demokracisë së Re, që kërkojnë zgjedhje të parakohshme para votimit në parlament, vazhdojnë ta quajnë këtë marrëveshje të dëmshme për vendin dhe historinë e tij, duket se deputetë të veçantë të partive të tjera opozitare në parlament do të japin votën e tyre pozitive.

Kështu përveç 145 ligjvënësve të grupit të Syrizës, kryeministri Cipras do të këtë votat e tre deputetëve të partisë Potami (Lumi), të dy deputetëve nga partia aleate e ish ministrit të Mbrojtjes Panos Kammenos dhe të një deputeti të pavarur.

Por gjithashtu në një intervistë të tij, ish kryeministri Jorgos Papandreu ka pohuar se edhe ai do të votojë pro marrëveshjes, ndërsa në këtë listë mund të shtohen edhe një ose dy deputetë nga socialistët grekë, duke u tejkaluar kështu shumica prej 151 votash.
Shtuar më 20/01/2019, ora 09:39
Shkruani komentin tuaj!
Të fundit nga kjo kategori