Nuk do t’ju përgjohen vetëm telefonat sikurse deri më tani. Me ndryshimin e ri të ligjit për ndjekjen e komunikimeve parashihet që çdo komunikim tjetër përmes internetit përfshi facebokun, Tweeter, Viberin, msn, skype, mail etj do të jetë nën mbikëqyrje të shërbimeve edhe atë ligjërisht. Ndryshe do të rritet edhe numri i organeve shtetërore që do të kenë të drejtë të përgjojnë qytetarët. Përpos organeve që e kanë bërë këtë deri më tani, tani do të përgjojnë edhe Prokuroria, Dogana dhe policia financiare. Ekspertët që merren me të drejtat e njeriut thonë se me këto ndryshime cenohet privatësia e qytetarit. Osman Kadriu tha se nëse këto ndryshime kalojnë në Kuvend, atëherë një numër I dispozitave të këtij ligji duhet abrogohen se janë në kundërshtim me kushtetutën. “Meqë rritet numri i organeve të cilët do të përdorin ligjin për përgjim dhe me këtë në mënyrë flagrante do të shkelen të drejtat dhe liritë e njeriut, ky ligj jam i mendimit se nuk është në përputhje me parimet kushtetuese të Maqedonisë, sidomos me ato kapituj të kushtetutës të cilët flasin dhe i garantojnë të drejtat dhe liritë e njeriut”, tha Osman Kadriu, ekspert për çështje juridike. Kryetari i Komitetit të Helsinkit, Gordan Kallajxhiev thotë se problem është se edhe institucione tjera përpos MPB-së do të mund të përgjojnë. “Ka disa probleme, për shembull askush nuk mendonte se përpos MPB-së tash do të duhet të përgjojë edhe Policia Financiare, Dogana. Nuk menduam se ata do të merren me përgjim. Përpjekjet ishin që prokuroria të autorizohet me tepër. Problemi kryesor edhe më tej mbetet që, kontrolli, përgjimi dhe masat tjera me çka hyhet në privatësi, të mbetet vetëm për ato forma më të zgjeruara, si terrorizëm, krim të organizuar e kështu me radhë”, tha Gordan Kallajxhiev , kryetar i Komitetit të Helsinkit. Ekspertja për të drejtat e njeriut Margarita Caca Nikollovska në një debat publik në Kuvend tha se ligji i ri cënon të drejtat themelore të njeriut, pasi vetë ekzistimi i këtij ligjit është në kundërshtim me të drejtat e njeriut ndërsa këtë e përkeqëson akoma më shumë mundësia që sipas ligjit të ri vetëm më urdhër gojore pa vendimin e gjykatës kohëzgjatja e përgjimit të jetë mbi 24 orë. “Me këtë ligj fakti që kërkohet të rritet koha që pas dhënies së urdhrit gojor apo pranimit të urdhrit gojor që të kryhet një ndërhyrja në të drejtat e njeriut dhe mundësia që nga 24 orë të rritet në 48 orë dhe të jepet mundësi që të rritet kjo akoma më shumë, dhe ç’është më e rëndësishme që për një gjë të tillë nuk ekziston argumentin i arsyeshëm mendoj se është e patolerueshme, dhe nesër pasnesër derisa ky ligj kalon dhe nëse dikush e kupton se ka qenë objekt i përpunimit përmes këtij ligji, ky shtet do të ketë probleme”, tha Margarita Caca Nikollovska, Instituti për të drejtat e njeriut (07.06.2012). Këtë propozim ligj të ri për ndjekjen e komunikimeve, një javë më parë në Kuvend e kontestuan dhe kritikuan edhe deputetët e opozitës. Sipas tyre ligji i ri për përgjim aspak nuk i respekton rekomandimet e Bashkimit Evropian, dhe nuk ka për qëllim luftën kundër krimit të organizuar dhe korrupsionit por në mënyrë shtesë do të kontribuojë që sistemi të jetë i politizuar dhe korruptiv. Ndërsa kontestues është edhe fakti që në ligj nuk definohet qartë sa mund të zgjas përgjimi sikurse fakti që institucionet do të duhet të harxhojnë shumë të madha për t’u pajisur me mjete speciale për përgjimin e internetit. /alsat-m/