Banka Botërore: Ekonomia e Maqedonisë së Veriut këtë vit do të shënojë rritje prej 2,4 për qind

Ekonomia e Maqedonisë së Veriut këtë vit do të shënojë rritje për 2,4 për qind, vlerëson Banka Botërore në raportin më të ri për perspektivat ekonomike globale.

Rritja ekonomik në vend lehtë do të përshpejtohet deri më 2,7 për qind në vitin 2024 dhe 2,9 për qind në vitin 2025.

Banka Botërore parashikon që i gjithë rajoni i Ballkanit Perëndimor këtë vit do ta përfundojë me një rritje ekonomike prej 2.6 për qind. Faktorët kryesorë që ndikojnë në perspektivën ekonomike janë ndikimet e luftës në Ukrainë, konsumi më i ulët personal, ashpërsimi i kushteve financiare globale dhe kërkesa më e dobët në Eurozonë.

Nga vendet e rajonit, këtë vit rritje më të lartë ekonomike do ta shënojnë Kosova 3.7% dhe Mali i Zi 3.4%. Shqipëria do të ketë një rritje prej 2.8%, Bosnja e Hercegovina 2.5%, Serbia 2.3%, Kroacia 1.9% dhe Bullgaria 1.5%.

Sa i takon perspektivës globale, Banka Botërore pret që rritja ekonomike gjatë këtij viti të ngadalësohet dhe të arrijë 2.1% krahasuar me vitin e kaluar me 3,1%.