Kanë kaluar plot 11 vjet nga masakra e Lubotenit por akoma nuk ka ndodhur asgjë. Askush nuk ka marrë përgjegjësinë, ndërsa për këtë masakër është dënuar vetëm një person. Dhe në vend që të shuhej, falë indiferencës së politikës e cila e ka braktisur fshatin e përvuajtur, dhimbja e Lubotenasve çdo ditë e më shumë bëhet edhe më e thellë.

Me 12 Gusht 2001, forcat maqedonase vranë 10 civilë shqiptarë, rrahën e maltretuan qindra të tjerë ndërsa 14 shtëpive iu vu zjarri qëllimisht.

Rasti i Lubotenit ka kaluar në historinë e Maqedonisë si i vetmi rast i proceduar nga Gjykata e Hagës, e cila dënoi për krime lufte ish pjesëtarin e lartë të forcave të Sigurisë Johan Tarçullovski, ndërsa i akuzuari i parë, ministri i Brendshëm i asaj kohe Lube Boshkovski, në mungesë provash u lirua nga akuza.

10 viktimat e masakrës së Lubotenit janë: Erxhan Aliu (6 vjeç), Dalip Murati, Muharem Ramadani, Memet Memeti, Rami Jusufi, Xhelal Bajrami, Kadri Jashari, Bajram Jashari, Sulejman Bajrami dhe Atulla Qaili. /albeu.com/