Durimit të shteteve perëndimore për luftën diplomatike që po bën Serbia ndaj Kosovës duket se i ka ardhur fundi,shkruan albeu.com.

Pas lajmit se Franca do të dërgojë notë proteste ndaj çdo shteti që tërheq pavarësinë e Kosovës me kërkesë të Serbisë, ka reaguar edhe Britania e Madhe.

Sipas portalit nga Beogradi “Srbija danas” (Serbia sot), Britania e Madhe ka hyrë në luftë të hapur me Serbinë për ta rrëzuar Vuçiçin dhe pushtetin në Beograd, për ta ndarë Serbinë nga Rusia dhe për t’ia siguruar Kosovës pavarësinë e plotë dhe ulësen në Kombet e Bashkuara.

Nga Londra, gjithnjë sipas këtij portali, ka arritur mesazhi i qartë për Serbinë dhe për vendet që rishqyrtojnë njohjen e tyre të Kosovës ose që Serbinë e përkrahin në ndonjë mënyrë: "Do ta shkelim çdokënd që do ta përkrahë Serbinë".

Këto presione nga shtetet e BE-së i kishte pranuar edhe Daçiçi i cili ka theksuar se një vend i Bashkimit Europian dhe anëtar i përhershëm i Këshillit të Sigurimit në OKB, ka thënë në Përfaqësinë e përhershme të Serbisë në Nju- Jork se është i irrituar me veprimet e Serbisë kundër Kosovës.

Anëtarë të përhershëm të Këshillit të Sigurimit të Kombeve të Bashkuara dhe anëtare të BE- së janë Britania e Madhe dhe Franca.

Kohët e fundit ka pasur një përpjekje të shtuar nga ana e Serbisë për të bindur vende afrikane që ta tërheqin njohjen e pavarësisë së Kosovës. E megjithatë duket se iniciativa e diplomacisë serbe do të përfundojë pa sukses pasi vetëm një shtet i vogël afrikan pretendohet se ka tërhequr njohjen./albeu.com/