Disa qytete në Maqedoni, si Tetova, Shkupi, Manastiri dhe Kërçova janë konstatuar se kanë ndotje tepër të lartë.

Shkupi ka qenë qyteti i parë që ka vënë në zbatim një plan për ta shpëtuar qytetin nga ndotja kancerogjene.

Nga ana tjetër, Tetova është qyteti që e mban rekordin për ajrin më të ndotur jo vetëm në Maqedoni, por edhe në Ballkan.

Tetova, veç rekomandimeve që kanë ardhur nga Ministria e Mjedisit Jetësor dhe Planifikimit Hapësinor, nuk ka marrë masa konkrete për të parandaluar fenomenin.

“Masa kundër ajrit të ndotur në Tetovë janë marrë. Është paralajmëruar mbyllja e Jugohromit nga ana e Ministrisë së Mjedisit, kurse ne si Komunë kemi ndjekur rekomandimet e Qeverisë dhe kemi vendosur ndalesa për kamionët, pastaj japim leje të integruara B për hapjen e firmave, të cila nuk ndotin ajrin si dhe jemi munduar që të gjelbërojmë qytetin.” shprehet zëdhënësja e komunës së Tetovës, Lume Hyseini për Portalb.

Por masat në fjalë në lidhje me ndalesat e komunikacionit të ndërmarra nga Qeveria e Maqedonisë, bashkë me Komunën e Tetovës dhe Ministrinë e Ambientit Jetësor kundër ndotjes së ajrit janë thuajse identike me masat e ndërmarra nga komuna para katër viteve, por që nuk u respektuan asnjëherë.

Aktualisht, Tetova ka një ndotje disa herë më të madhe nga masa e lejuar./albeu.com/