INTERVISTA/ Aliti: Më burgosën nipin për të larë hesapet me mua
Ndarja e BDI-së në krahun intelektual dhe luftarak nuk është adekuat. Të gjithë që kanë qënë pjesë e udhëheqësisë së UÇK-s janë intelektualë, të arsimuar.

Bëhet fjalë për ndarje të kuadrove të suksesshëm dhe të pasuksesshëm në BDI të cilët duhet të pajtohen me atë që nuk e kanë arsyetuar besimin.

Kështu thotë Rafis Aliti, deputet dhe ish nenkryetar i BDI-së në një intervistë për javoren "Fokus".

Ai ka lëshuar dhe deklarata të tjera të forta, të cilat mund ti lexoni më poshtë. /albeu.com/

Ja intervista e plote:

Emri Juaj kohën e fundit përmendet në kontest të inicijativës për formimin e partisë së re të ashtuquajtur “Uniteti”, të cilën duhet ta formojnë funksionar dhe përfaqësues të BDI-së të cilët janë të pakënaqur nga dhe sjellja e partisë më të madhe të Shqiptarëve. Prej nga rrjedh kjo?

ALITI: Është e saktë se ka lëvizje të brendshme partiake dhe mendime nga anëtarët tanë për formimin e subjektit të ri politik. Kjo është pasojë e asaj që gjatë kohë në BDI kërkohen ndryshime dhe kërkohet që të reformohet partia, kështu që prej këtu ekziston pakënaqësia. Plus, pakënaqësia edhe në krye edhe në strukturat e BDI-së është rezultat i asaj që nuk është implementuar tërësisht Marrëveshja Kornizë e Ohrit. Bëhet fjalë për anëtarë të theksuar të BDI-së të cilët gjatë kohë kanë qenë anëtarë edhe të kryesisë qendrore të partisë.


Kush janë këta njerëz dhe në cilën fazë të zhvillimit është ky proces?

ALITI: Deri tani publikisht është deklaruar vetëm deputeti Zulfi Adili, ndërsa përmendet edhe emri i Gëzim Ostrenit i cili në dy mandate ishte edhe Sekretari i Përgjithshëm i i BDI-së, edhe pse ai vetë këtë nuk e ka konfirmuar. Kështu që ne jemi në pritje nëse edhe ndonjë anëtarë do ti bashkëngjitet kësaj iniciative e cila është në fazë të mbledhjes së nënshkrimeve për regjistrim të partisë së re, kështu që sipas të gjitha gjasave shumë shpejtë edhe vetë iniciatorët do të dalin me emër të partisë dhe me informatë se cilët anëtarë të BDI-së do të bëhen pjesë e saj.


Thatë se nuk do ta lëshoni BDI-në, por deklaruat se është e domosdoshme që BDI të reformohet. Në cilat baza kadrovike dhe programore duhet të reformohet partia?

ALITI: Më me rëndësi është që të reformohet në aspekt kadrovik. Ne kemi njerëz të cilët gjatë kohë janë pjesë e pushtetit. Është normale se duhet të vlerësohet puna e tyre dhe angazhimi të cilin e kanë dhënë. Kur flas për njerëz të cilët gjatë kohë janë në pushtet kryesisht mendoj për persona të pushtetit ekzekutiv të cilët gjatë kohë janë ministra dhe zëvendëskryeministra. Edhe krahas kontributit të tyre të padyshimtë , të jemi realë, dikush duhet të jep llogari për atë se pse nuk është implementuar Marrëveshja e Ohrit, përse ende nuk kemi përfaqësim të drejtë në institucionet dhe organet e shtetit, përse ende gjuha shqipe nuk përdoret në nivel të cilin e garanton Kushtetuta neve na ndodh të mos zbatohet Kushtetuta dhe ligjet dhe për këtë duhet të kërkohet përgjegjësi tek njerëzit tanë në BDI, ndërsa jo gjithmonë ta drejtojmë gishtin te partneri ynë i koalicionit ose te dikush tjetër.


NË BDI NUK DUHET TË KETË FUNSKIONAR TË PAZËVENDËSUESHËM


FOKUS: Veç më gjatë kohë flitet se ka konflikt në mes të përfaqësuesve të krahut të luftës , deputetëve dhe kryetarëve të komunave të cilën kanë përkrahje në bazë, nga njëra anë dhe funksionarëve, më së shpeshti ministra të cilët janë të pazëvendësueshëm, Sa ka të vërtet këtu?

ALITI: Si do që të jetë, disa anëtarë të BDI-së kanë perceptim se disa njerëz në ekzekutiv janë të pazëvendësueshëm. Unë ju them se në BDI nuk ka kurfar ndarje në krah të luftës dhe atë intelektual, por ka ndarje të kuadrove të suksesshme dhe të pasuksesshme, të cilët gjatë kohë janë në pushtet. Nëse dikujt i është dhënë besimi dhe mundësia të jetë në pozitë të rëndësishme dhe atë pozitë nuk e arsyeton, ai duhet ta lëshojë atë pozitë. Ne atë mirëbesim e marrim nga qytetarët, ndërsa organet e partisë atë mirëbesim e kanë bartur te njerëzit të cilët në momentin e caktuar kanë konsideruar se mund ta implementojnë platformën dhe t’i realizojnë premtimet ndaj qytetarëve. Por nëse kjo nuk ndodh, gjithsesi se dikush do të mbaj përgjegjësi. Të pazëvendësueshëm nuk duhet të ketë.


Shumica konsiderojnë se iniciativa për formimin e partisë së re është motivuar nga pamundësia e një pjese të funksionarëve të BDI-së për t’i realizuar ambiciet për hyrje në pushtetin ekzekutiv, dhe prandaj tani kërcënohen apo tentojnë të imponohen te udhëheqësia partiake me lajmërimet për parti të re politike, gjoja për shkak të pasivitetit të BDI-së në koalicionin qeveritar, moszbatimi i Marrëveshjes Kornizë dhe ngecja në eurointegrime.

ALITI: Prej anash që spekulohet në opinionin, nëse BDI-ja ka njerëz që janë në pushtetin ekzekutiv dhe nuk mund ato procese t’i lëvizin përpara, atëherë dikush duhet të mbajë përgjegjësi dhe të zëvendësohen. Shtrohet pyetja: Pse BDI-ja ngec në vend? Qëllimi kryesor dhe premtimi i BDI-së në zgjedhjet e fundit është integrimi i Maqedonisë në NATO dhe BE, megjithatë të gjithë jemi dëshmitarë se kjo nuk ndodhi. Nuk them se vetëm ne jemi përgjegjës për të, por kuptohet se mbajmë përgjegjësi para elektoratit tonë. Ne u tërhoqëm nga agjenda jonë nacionale vetëm t’u japim përparësi integrimeve. Prandaj ka pakënaqësi edhe në strukturat, anëtarësinë dhe te elektorati i BDI-së, sepse vendi jashtë NATO-s dhe BE-së është paperspektivë.

Pse askush për këtë nuk kërkon përgjegjësi nga lideri, i cili duhet të mbajë përgjegjësinë më të madhe si njeriu i parë i partisë?

ALITI: Jo rastësisht them se kjo temë është e hapur në BDI dhe të gjithë mbajmë përgjegjësi, pa marrë parasysh se kush në çfarë pozite është. Atë që e kemi realizuar mirë për qytetarët është e mirë, por ne duhet të jemi objektiv se nuk kemi bërë hap përpara në eurointegrimet, por kemi bërë një hap mbrapa. Jemi të vetëdijshëm se shumë ngjarje e kanë distancuar vendin nga eurointegrimet. Fatkeqësisht të gjithë jemi nga pak fajtorë për atë se përse shteti gjendet në baltë. Falë faktorit ndërkombëtar mund ta nxjerrim Maqedoninë nga ai vend ku gjendet. Momentalisht shteti ka dy rrugë – ose do ta zbatojmë Marrëveshjen e Përzhinos për tejkalimin e krizës politike, ose Maqedonia nga balta do të zhytet në rërë të gjallë.



E BURGOSËN NIPIN TIM, QË T’I QËROJNË HESAPET ME MUA


Vallë, BDI-ja si parti dhe udhëheqësi do të arrijë ta menaxhojë këtë situatë të pakënaqësisë dhe revoltit e cila siç pamë ekziston sadopak në çdo degë, ndër të cilat, edhe dega juaj në Saraj, ku kishte qërim hesapesh fizike, e diku, si p.sh.: në Kumanovë, konflikte ndërmjet punëve të ndryshme që përfunduan me vrasje?

ALITI: Ne kishim zgjedhje brenda partiake dhe dy ose më shumë rryma në parti që garonin ndërmjet vete. Në disa vende u shkel e ashtuquajtura vija e kuqe nga disa aktivistë tanë. Sa i përket kësaj, mendoj se BDI-ja do të arrijë t’i zgjidh ato probleme, sepse besoj se të gjithë kanë energji pozitive që këto probleme që ekzistojnë realisht të zgjidhen në interes, edhe të partisë, edhe të votuesve.

Nga burimet jozyrtare flitet një kohë e gjatë se për shumë funksionarë të BDI-së ka njëfarë dosje për shkak të së cilës duhet t’i mbajë të dëgjueshëm dhe të qetë, në të kundërtën do të pësojnë njëfarë dëmi.

ALITI: Cilido funksionar i BDI-së nëse ka informata të tilla duhet të largohet nga partia.

Pikërisht në atë drejtim burgosja e nipit tuaj, i cili ishte shef i Kabinetit tuaj derisa ju ishIt drejtor i “Postës së Maqedonisë”, interpretohej si presion për të mos e lëshuar BDI-në dhe si porosi për të tjerët të tërhiqen nga ideja për të kaluar në parti të re.

ALITI: Në rastin tim është simptomatike ajo që nga fillimi i gjykimit, arrestimi i nipit tim ishte pompoze, edhe pse nuk bëhet fjalë për kriminel i cili dikur ka ikur nga policia dhe gjykata. Unë personalisht dhe njerëzit përreth meje dyshojnë pse kjo ka ndodhur dhe pse arrestimi i fundit ndodhi derisa ishte në punë, në vend që të marrë ftesë për t’u paraqitur në gjykatë. Avokatja që e përfaqëson konsideron se arrestimi i tillë është në kundërshtim me ligjin gjë që më bëri të dyshoj se kjo ndodh vetëm për shkak të qëndrimeve të mia politike, të cilat i ndaj publikisht. Nuk u dogj vetëm posta, por më herët dhe pas kësaj kishte shumë ngjarje të tilla – Moteli në Kodrën e Diellit, Pushimorja e MPB-së në Ohër, manastiret, por asnjë nga këto raste nuk u paraqit në mënyrë pompoze nëpër mediume dhe nuk kam dëgjuar se dikush është arrestuar. Nipi im duhet të ketë qenë përbindësh për ta djegur postën, e ai në ato çaste as që ka qenë në objekt. Janë angazhuar ekspertë të cilët kanë dorëzuar dokumentacion në gjykatë se zjarri nuk ka ndodhur nga pakujdesia. Unë vetë kam marrë pjesë në shuarjen e zjarrit. Kjo sipas meje është qërim hesapesh politike.


NJË NJËSI ZGJEDHORE DHE LISTA TË HAPURA

Si e përjetuat aferën me përgjimet dhe bisedat e publikuara ku ministrat e partnerit më të madh ju quajnë si “Indianë, me të cilët duhet të qërohen hesapet”?

ALITI: Jo se te ne nuk ka revolt, por revolti është më i madh te qytetarët. Megjithatë, ky komunikim është ndërmjet njerëzve të kreut të shtetit dhe kjo nuk është mirë për shtetin për mirëbesimin që duhet ta ndërtojmë. Edhe po të jenë biseda private duhet të mbahet konsideratë se çfarë flasim si persona publikë.

Çfarë mendoni për “bombat” të cilat tregojmë se si funksionarët e BDI-së merren vesh me njerëzit e VRMO-DPMNE-së për vepra kriminale?

ALITI: Prokurori Special duhet të dëshmojë nëse ka ose nuk ka montazh në këto bisedime dhe kush e ka urdhëruar incizimin.

Sipas jush çfarë është më e rëndësishme – të konstatohet kush e ka urdhëruar përgjimin, ose nëse bisedimet zbulojnë vepra të paligjshme?

ALITI: Për mua është e rëndësishme të dihet nëse bisedimet janë autentike. Prokurori Special duhet ta japë atë përgjigje. Pastaj është shumë e rëndësishme përmbajtja e bisedimeve. Nëse nuk ka montazh për gjithçka që është zbuluar dhe nuk është zbuluar para opinionit duhet të zbulohet se kush në çka ka qenë i përfshirë.

FOKUS: Segment shumë i rëndësishëm nga negociatat, përveç Prokurorit Publik Special, është të përcaktohen kushtet dhe rregullat për zgjedhje të ardhshme. A ka ambient normal për zgjedhje, sepse opozita i konteston rezultatet zgjedhore, ndërsa pushteti thotë se nuk ka dëshmi se zgjedhjet janë të falsifikuara?

ALITI: Tek elektorati shqiptar zgjedhjet e fundit deri më tani janë organizuar në mënyrën më të drejtë pa asnjë vërejtje. Unë konsideroj se shteti duhet të jetë një njësi zgjedhore me lista të hapura, pa pragun prej 5%, por pragu të jetë 2 – 3% për hyrje në Kuvend. Në mënyrë plotësuese, për komunitetet më të vogla etnike duhet të kemi të garantuara vende të deputetëve, për shembull 10. Sipas Kushtetutës, ato komunitete etnike meritojnë të kenë përfaqësues të tyre në Kuvend dhe të dëgjohet zëri i tyre. Maqedonia është shtet multietnik dhe sa më afër realiteteve të shtetit të jemi aq më mirë do të jetë. Me një njësi zgjedhore dhe lista të hapura do të demokratizohen edhe partitë, ndërsa pa demokratizimin e tyre nuk do të demokratizohen as institucionet e shtetit.

A kemi mbështetje për qëndrimin e tillë? Kjo bie ndesh me qëndrimin e përgjithshëm të partive të mëdha kur një njësie zgjedhore dhe listave të hapura, duke pasur parasysh se nuk do të ketë kontroll mbi partitë e vogla politike dhe do të paraqitet një betejë brenda partiake, ndërsa Parlamenti do të jetë jostabil. Bile edhe nga partia juaj konsiderojnë se një njësi zgjedhore mund të rrezikohet rregulli i Bandeterit.

ALITI: Në atë mënyrë, Parlamenti dhe institucionet do të punojnë në mënyrë demokratike. Në këtë mënyrë nuk do të rrezikohet rregulli i Bandeterit, sepse do t’u garantohen dhjetë vende deputetësh bashkësive më të vogla etnike dhe me këtë do të eliminohet mundësia për falsifikimin e identitetit të deputetit, ajo që na ndodhi tani. Kështu fenomene të këtilla nuk do të kemi dhe nuk do të rrezikohet votimi i dyfishtë.


NUK KA FALSIFIKAT ZGJEDHOR, KA KEQPËRDORIM TË INSTITUCIONEVE

A mendoni se diaspora duhet të ketë të drejtë të votës dhe përfaqësues në Kuvend?

ALITI: Nëse duam të jemi të sinqertë, ne saktësisht e dimë sa njerëz kemi jashtë vendit të cilët kanë shtetësi të Maqedonisë dhe të cilët çdo vit vijnë në Maqedoni, investojnë, janë të interesuar dhe të lidhur me atdheun. Ne mund t’u japim mundësi të votojnë për deputetët që zgjidhen këtu në shtet. Nëse tanimë duam të kemi deputet nga diaspora, ajo mundësi duhet të ekzistojë me atë që nuk duhet paraprakisht njerëzit në diasporë të paraqiten nëse do të votojnë sepse më përpara e dimë se kush për cilin do të votojë. Ne si BDI kishim vërejtje në shumë qytete se nuk u jepet mundësia të votojnë qytetarëve të Maqedonisë që jetojnë jashtë. Disave u është thënë se nuk janë paraqitur në kohë edhe pse në ditën e zgjedhjeve kanë qenë në vendin e votimit në ambasadë. Logjistika dhe të punësuarit në ambasadat në botë nuk kanë të bëjnë konkretisht me votuesit shqiptarë.

Cili është qëndrimi juaj në besueshmërinë e listës zgjedhore?

ALITI: Në Maqedoni mendoj se nuk është problem lista e zgjedhësve. Problemi është tjetër. Nëse mundësojmë që dikush brenda natës të marrë shtetësi dhe të marrë të drejtën e votës, atëherë diçka nuk është në rregull me institucionet e shtetit. Fenomene të tilla kemi pasur kur njerëzit nga Shqipëria dhe nga vendet tjera morën shtetësi që të votojnë. Ky është keqpërdorim.


A keqpërdoren institucionet për presion dhe për blerje të votuesve?

ALITI: Ky fenomen është prezent. Unë nuk kam pasur mundësi të dëgjoj se ndonjë i punësuar në administratë ka presion nga eprori të votojë për të ose për atë, ose në të kundërtën do të përjashtohet nga puna, që nuk do të thotë se kjo nuk është prezent. Kur je në pushtet ke mekanizma të kontrollosh shumë gjëra dhe për këtë mund të bësh presion. Megjithatë, nuk besoj se këto presione i japin rezultatet konkrete. Fundja, secili njeri e ka integritetin e vet, e nëse dikujt i bën presion, mund të ketë kundërefekt.


KOHA E LUFTËRAVE TË BALLKANIT KA PËRFUNDUAR


Keni qenë pjesëmarrës të drejtpërdrejtë në konfliktin e vitit 2001, andaj si shikoni në këtë episode të zezë nga perspektiva e sotme?

ALITI: Konflikti u shkaktua sepse shqiptarët u trajtuan si qytetarë të rendit të dytë dhe të tretë. Me miratimin e Kushtetutës pas pavarësisë, në vend se të avancohen, të drejtat e shqiptarëve u kthyen më mbrapa nga ajo që ishte e garantuar në kohën e Jugosllavisë. Ndjenja se qytetarët nuk janë të barabartë me bashkëqytetarët tjerë nuk është e mirë. Marrëveshja paqësore e Ohrit solli paqe në vend dhe duhej që të angazhohen më seriozisht të gjitha faktorët politik që ta zbatojnë marrëveshjen. Ne si BDI kemi pasur obstruksione në zbatimin e marrëveshjes së Ohrit dhe ajo që sot është kushtetutë kemi problem të zbatohet. Kemi individë në shtet në funksione të larta që nuk e respektojnë këtë marveshje. Shqiptarët e duan bashkëjetesën dhe të jetojnë të barabartë. Megjithatë vallë këtë e duan ose jo maqedonasit?

Mendoni për popullin maqedonas ose për elitat politike?

ALITI: Populli nuk i ka problemet që i kanë elitat politike, sepse qytetarët e rëndomtë çdo ditë funksionojnë njëri pranë tjetrit. Megjithatë një pjesë e elitave nuk duan ta shohin Maqedoninë ku qytetarët do të jenë të barabartë, madje do të them se ka edhe forca të errëta. Rrihen fëmijët vetëm sepse flasin në gjuhën shqipe, këto janë forca të errëta, kurse dikush qëndron pas tyre, shumë prej këtyre rasteve nuk u zbuluan dhe i motivuan këto forca.

Doni të thoni se ka njerëz që ëndërrojnë për pjesën e dytë?

ALITI: Ka njerëz të tillë edhe te maqedonasit edhe te shqiptarët, por përfunduan luftërat në Ballkan. Tani është koha kur duam ose jo problemet duhet t’i zgjedhim në tryezë. Nuk jam aq optimist se ekziston dëshirë politike në mënyrë të vërtetë t’i zgjidhë problemet politike që të jemi më perspektivë. Do të përsërisë se është mirë që faktori ndërkombëtar është prezent dhe na ndihmon. Marrëveshja në Përzhino duhet doemos të zbatohet, e jo marrëveshja në klubin e deputetëve të ndryshohet gjatë rrugës për në Kuvend, ku votuam ligj tjetër.


Në çka mendoni konkretisht?

ALITI: Ligjin për prokuror special që e votuam ka pasur një nen për përfaqësim të drejtë dhe adekuat në administratë, kurse dikush ka marrë të drejtë që këtë ta falsifikojë dhe këtë nen ta largojë prej ligjit. Kjo më bën të dyshoj në sinqeritetin e njerëzve që i ujdisin gjërat dhe ta informojnë realisht deputetin për atë që janë marrë vesh. Unë kam votuar ligj të falsifikuar. Nuk duhet ta minojmë marrëveshjen. E njëjta na ndodhi edhe me marrëveshjen e Ohrit, e cila ishte nënshkruar nga të gjithë, kurse kjo filloi të ndryshohet kur u shndërrua në kushtetutë, duke filluar nga preambula dhe shumë çështje mbeten të hapura.


ENDE NUK I KEMI ZGJIDHUR ÇËSHTJET ETNIKE

Kryeministri Gruevski kohën e fundit është në fushatë të përforcuar, me ç’rast vizitoi mjedise me shumicë shqiptarë dhe mjedise shqiptare multietnike. A ka ardhur koha që shqiptarët të votojnë për parti maqedonase dhe e kundërta?

ALITI: Kryeministri është kryeministër i të gjithë qytetarëve. Tjetër është nëse kjo do të thotë se do t’i marrë votat e qytetarëve nga komuniteti tjetër etnik ose fe. Koha që shqiptarët të votojnë për parti maqedonase dhe e kundërta është dashur të vijë që moti, ne nga BDI-ja insistuam që kjo të zbatohet me marrëveshjen kornizë. Fatkeqësisht, në zgjedhjet e fundit VMRO-DPMNE kërkoi vota maqedonase që të mos shantazhohet nga BDI-ja. Dhe ende i marrim votat për platformën tonë politike ku ka probleme etnike të pazgjidhura, e derisa nuk i zgjidhim këto probleme, nuk mund t’u përkushtohemi sfidave ekonomike. Kemi pasur situatë kur shqiptari kërkoi vota maqedonase, por kjo nuk mund të ndodhë anasjelltas sepse politikanët maqedonas nuk dinë asnjë fjalë shqip.



BDI–JA NUK DO TË JETË MË AJO QË KA QENË


Sa ky proces i përçarjes të BDI-së, kundrejt procesit të bashkimit para disa vitesh, do ta dëmtojë partinë?

ALITI: BDI-ja është parti e konsoliduar, por pas kësaj që duhet të ndodhë me iniciativën për formimin e partisë së re gjithsesi se BDI-ja nuk do të jetë ajo që ka qenë deri më tani. Këtë e them pasi deri më tani edhe partitë më të vogla politike na bashkëngjiteshin neve, kishte proces të rritjes të BDI-së. Me vetë faktin që tani, pa marrë parasysh se cila do të jetë pesha te elektorati shqiptar të të gjitha subjekteve politike të sapoformuara të shqiptarëve, ambienti politik ndryshon. mendoj se mund të ketë rënie të BDI-së, por të vogël, pasi unë deri më tani nuk shoh se ndonjëra prej partive të sapoformuara ka dalë me ofertë për shqiptarët apo me diçka të re. Platforma e tyre politike është pothuajse e njëjta si ajo që e kanë subjektet aktuale politike të shqiptarëve, derisa ndonjëra prej tyre nuk del me vizion të ri për statusin e shqiptarëve dhe për ambientin e përgjithshëm për shtetin, për rregullim të ri shtetëror dhe ngjashëm, nuk do ti marrë votat dhe besimin më të madh të shqiptarëve. Nuk shoh se as tek partitë maqedonase ofrohet koncept i ri.
Shtuar më 03/10/2015, ora 09:17

Shkruani komentin tuaj!
Të fundit nga kjo kategori