Injorimi i artistëve shqiptarë çon vendin në ndarje
Lëvizja Qytetare ZGJOHU!
Lëvizja Qytetare Zgjohu ka shprehur sot pakënaqësinë dhe revoltën e vet në lidhje me organizimin e koncertit për kremtimin e Ditës së pavarësisë së Republikës së Maqedonisë, 8 Shtatorit, në të cilin nuk do të paraqitet asnjë artist shqiptar e nuk do të dëgjohet asnjë refren në gjuhën shqipe e cila sipas Kushtetutës së vendit është gjuhë zyrtare.

Lëvizja qytetare "Zgjohu" konsideron që ky akt është vazhdueshmëri e tendencës së përjashtimit të kulturës së lashtë autoktone shqiptare. Edhe në kremtimet dhe organizimet e mëparshme të ngjashme, artistët shqiptarë kanë qenë të privuar nga e drejta e performimit në gjuhën shqipe.

"Më i tmerrshëm është fakti se këto organizime kulturore realizohen me mjete buxhetore të Qeverisë të siguruara nga taksapaguesit, ndër të cilët kontribuesit më të mëdhenj janë shqiptarët. Për fat të keq, kultura dhe gjuha shqipe ende mbeten elemente të padëshirueshme në një shtet multietnik dhe multikulturor siç është Maqedonia dhe autoritetet e vendit akoma hezitojnë të pranojnë që karakteri mono-etnik i shtetit kapitulloi në vitin 2001", thonë nga kjo lëvizje.

Zgjohu i fton të gjithë institucionet kulturore që të depolitizohen dhe të merren vetëm me kulturë dhe në këtë aspekt të ja japin hapësirën e merituar kulturës dhe gjuhës shqipe në të gjitha evenimentet e organizuara nga fondet shtetërore në të cilat kontributi i shqiptarëve është i drejtpërdrejtë dhe i pamohueshëm.

"Ndryshe, shqiptarët nuk kanë asnjë arsye të vetme që të marrin pjesë dhe të respektojnë këto data dhe manifestime. Anashkalimi i artit dhe artistëve shqiptar nuk shërben në drejtim të marrëdhënieve të shëndosha ndëretnike dhe shpien drejt ndasive të mëtejme duke shkaktuar një perspektivë të paqartë të vendit dhe nuk është aspak në frymën evropiane e cila maksimalisht respekton divergjencat etnike dhe kulturore", thuhet në reagimine e lëvizjes Zgjohu. /albeu.com/
Shtuar më 05/09/2012, ora 13:45

Shkruani komentin tuaj!
Të fundit nga kjo kategori