Riçard Hovit, Raportuesi i Maqedonisë në Parlamentin Evropian, është shprehur sot se PE është kundër bojkotit të zgjedhjeve presidenciale në Maqedoni.

Ai ka nënkuptuar bojkotin e paralajmëruar nga faktori politik shqiptar në Maqedoni për zgjedhjet presidenciale që parashikohen të mbahen me 13 prill.

“Parlamenti Evropian dhe grupi ynë asnjëherë nuk mbështet bojkot të zgjedhjeve. Pjesëmarrja është kyçe, këtë e kemi thënë dhe do vazhdojmë ta themi. Na pyesin se çfarë mendojmë për raundin e dytë të zgjedhjeve presidenciale varësisht nga kandidatëve që do zgjidhen. Unë nuk mund t'ju them partive publikisht se çfarë duhet të bëjnë dhe çfarë jo, sepse jam i sigurt se kjo do të përdoret nga politika e brendshme ndërkaq ky nuk është pozicioni që dëshiron ta marrë as Parlamenti Evropian apo BE. Por kur themi se ne dëshirojmë që të gjitha partitë të marrin pjesë në zgjedhje shpresoj se kjo porosi të dëgjohet seriozisht”, ka theksuar Hovit. /albeu.com/