Eksponentë nga Partia Demokratike kanë reaguar pas arrestimit të një efektivi të RENEA-s, i cili ishte pjesë e një rrjeti të shpërndarjes së drogës.
Deputeti i zgjedhur i PD, Enkelejd Alibeaj, shkruan në Facebook se kjo nuk është rastësi, por është një project i mirëmenduar i Edi Ramës, i cili e ka vënë Policinë e Shtetit në shërbim të klaneve të drogës dhe vjedhjeve të votave.
Sipas Alibeajt, kupola e Policisë është e korruptuar dhe e lidhur kokë e këmbë me krimin, duke mos I dhënë mbështetjen e duhur policit të thjeshtë.
Reagimi i Alibeajt:
RENEA, reparti elitë i Policisë së Shtetit është infiltruar nga narkotrafikantët. 2 efektivë dhe 1 NënKomisar të këtij reparti janë arrestuar në pak kohë për organizim dhe trafik kokaine. Raportohet se 4 të tjerë ruajnë shtëpitë e mafiozëve me miliona euro.
Kjo nuk është rastësi, por produkt i aleancës së Edi Ramës me krimin, një model që ka prodhuar degradim të organizatës së Policisë dhe ka braktisur policët që shërbejnë me ndershmëri në mbrojtje të rendit dhe sigurisë.
Përgjimet e antimafias italiane dëshmojnë për implikim masiv të kupolës së Policisë së Shtetit në trafikun e kanabisit. Tashmë, shumica e shqiptarëve e di që teksa vendi kthehej në Kolumbinë e Europës me urdhër politik për të financuar shkatërrimin e zgjedhjeve, forcat e policisë përdoreshin si roje të parcelave me hashash dhe si punëtorë krahu për të ngarkuar skafet me lëndë narkotike.
Me bekimin e Edi Ramës krimi ka shtrirë duart mbi policinë, sepse ato janë të njëjtat duar që i shërbejnë për të vjedhur zgjedhjet dhe për të mbajtur me çdo kosto pushtetin.
Për shkak të këtij pushteti ilegjitim që ka kriminalizuar politikën, institucionet dhe policinë, qytetarët janë të pasigurt për të ardhmen e familjeve të tyre, të pasigurt për rendin dhe sigurinë.
Qytetarët nuk mund të ruhen edhe nga Krimi, edhe nga Policia që paguajnë nga taksat e tyre./albeu.com
