Hapja e negociatave me BE-në, Fuere: Ky vit, shansi i fundit për Maqedoninë
Ish-ambasadori i BE-së në Shkup, Ervan Fuere, e ka cilësuar si lajm të shkëlqyer strategjinë e zgjerimit të BE-së.
Ajo, sipas tij, njeh përpjekjet maksimale të qeverisë së re këto 11 muaj, për të kompensuar kohën e humbur nga qeveria e kaluar. Bisedimet rreth emrit janë në rrjedhë dhe po ecin mirë, ndaj nuk është e paarsyeshme të pritet që Greqia të lejojë vendim pozitiv në qershor, edhe nëse bisedimet rreth emrit nuk kanë përfunduar”,- tha Fuere në intervistën për MIA-n. Ai vlerëson se nëse Këshilli i BE-së nuk e miraton nisjen e negociatave me Maqedoninë këtë vit, atëherë viti i ardhshëm është i humbur për shkak të zgjedhjeve europiane.

Nëse nuk ka vendim pozitiv përpara fundit të vitit, atëherë kjo do të thotë se nuk do të ketë negociata, për shkak se viti i ardhshëm do të jetë i humbur, sepse Komisioni Europian do të rinovohet dhe do të ketë zgjedhje për Parlamentin Europian. Shpresoj se do të miratohet mesazhi i Mogerinit në Maqedoni, që Këshilli Europian në qershor të miratojë rekomandimin e Komisionit Europian. Në të kundërtën do të jetë negativ, pozita e qeverisë do të jetë e vështirë. Nëse Greqia vazhdon të pengojë rrugëtimin euroatlantik të Maqedonisë, edhe përkundër përpjekjeve të qeverisë në Shkup, kjo do të tregonte se Greqia nuk i ka përzemër interesat e Ballkanit Perëndimor, gjë që është në kundërshtim me frymën e agjendës së Selanikut të vitit 2003”,- tha Fouere.

Ish-ambasadori ka komentuar edhe Ligjin për gjuhët. Sipas tij, ishte gabim që ligji nuk u dërgua në Komisionin e Venecias, para miratimit në kuvend, e këtë ua ka thënë edhe përfaqësuesve shqiptarë në Qeveri.

“Tani ligji u miratua, por nuk hyn në fuqi sepse presidenti nuk e dekreton. Ndërkohë, ligji duhet të dërgohet tani edhe në Komisionin e Venecias. Komisioni ka procedura urgjente që mund të përdoren dhe rekomandimet që do të japë, mund të përfshihen në ligj. Kjo do ishte përgjigjja e duhur ndaj opozitës maqedonase, që pohon se ligji është anti-maqedonas. Deri në dërgimin e ligjit para komisionit, qeveria nuk ka mënyrë tjetër efikase që t’i kundërpërgjigjet opozitës”,- theksoi Fouere.

Për Fuerenë, Ligji për gjuhët është domosdoshmëri për Maqedoninë, jo vetëm për përdorimin e gjuhës shqipe, por për të gjitha gjuhët e etniteteve.
Shtuar më 01/05/2018, ora 20:12
Shkruani komentin tuaj!
Të fundit nga kjo kategori