Financimi selektiv i medias, Mijatoviç duhet të ndërhyjë
Gjendja aktuale e lirisë së medias dhe financimi i zhdrejtë, selektiv dhe i shpërpjesëtuar nga ana e Qeverisë, kërkon më shumë vëmendje ndërkombëtare dhe të organizmave përkatës, siç është OSBE-ja.

Përfaqësuesja për Median pranë kësaj organizate, Dijana Mijatoviç, i është drejtuar disa ditë më parë me një letër kryeministrit Nikola Gruevski, por kjo duket se nuk mjafton për të ndryshuar gjërat.

Zyrtarja e OSBE-së ka dhjetë herë më shumë arsye për të ardhur edhe personalisht në Maqedoni, si në rastin e Shqipërisë në vitin 2012, dhe të njoftohet drejtpërsëdrejti me gjendjen e medieve dhe raportin që kanë institucionet e shtetit me sektorin e medias.

Është mënyra më e mirë dhe më e drejtë, që Përfaqësuesja të informohet burimisht sidomos për injorimin e plotë financiar që institucionet e shtetit ua bëjnë medieve dhe gazetarëve shqiptarë.

Me përjashtim të disa medieve, që kanë zgjedhur të bëjnë shërbëtorin e interesave pushtetare maqedonase, media e mirëfilltë shqipe rezulton sot më e shpërfillur se kurrë, ndonëse i shërben një audience të konsiderueshme që kontribuon po ashtu konsiderueshëm në buxhetin e shtetit.

Zonja Mijatoviç duhet të vijë një orë e më parë dhe të shohë në vepër padrejtësinë më të madhe financiare që u është bërë ndonjëherë medieve në gjuhën shqipe, shkruan Zhurnal.

Vetëm një ndërhyrje ndërkombëtare do të mund të kthjellte drejtuesit e institucioneve për përgjegjësinë që kanë ndaj medieve dhe opinionit shqiptar, për të siguruar kushte të barabarta për zhvillimin e konkurrencës në sektorin medial.
Shtuar më 08/09/2013, ora 10:44
Shkruani komentin tuaj!
Të fundit nga kjo kategori