Fillon rikonstruimi i objektit të Teatrit shqiptar në Shkup
Objekti në të cilin është vendosur Teatri shqiptar-Shkup pas 40 vitesh ekzistim do të rikonstruohet në themel dhe pritet deri në shtator të vitit të ardhshëm të lëshohet në përdorim.

Sanimi dhe adaptimi në themel i këtij institucioni është investim i Qeverisë së Republikës së Maqedonisë në vlerë prej rreth 8 milionë euro.

Pas rikonstruimit në këtë objekt në mënyrë të pavarur do të punojë Teatri shqiptar, ndërsa ansambli i teatrit turk do të bëhet me teatrin e tij, i cili do të fillojë të ndërtohet gjatë këtij muaji përballë Stacionit Hekurudhor në Shkup.

Punimet ndërtimore me të cilat IP Teatri shqiptar - Shkup do të fitojë pamje të re, teknikë skenike të modernizuar, simbolikisht filluan sot në prani të kryetarit të Qeverisë, Nikolla Gruevski, zëvendëskryeministrit për zbatimin e Marrëveshjes së Ohrit, Musa Xhaferi dhe ministres së Kulturës Elizabeta Kançeska-Milevska. Ata në fjalimet e tyre theksuan se investimi është i rëndësishëm për zhvillimin e kulturës së shqiptarëve në Maqedoni dhe se kushtet e reja bashkëkohore do të jenë një motiv më shumë për aktorët dhe për kreativitetin e tyre.

Kryeministri Gruevski tha se edhe ky teatër gjatë viteve të kaluara ka punuar në kushte të dëmtuara të cilat nuk i përmbushin kriteret kryesore të veprimtarisë dhe për këtë shkak Qeveria i është përgjigjur kërkesave të tij me një projekt për rikonstruimin dhe adaptimin në themel të objektit në të cilin Teatri shqiptar që nga ekzistimi punon për katër dekada me radhë.

"Për këtë qëllim Qeveria dhuroi rreth 500 milionë denarë ose rreth 8 milionë euro me të cilat me të cilat do të realizohet projekti më i madh që nga themelimi Teatrit shqiptarMaqedoni. Do të intervenohet në arkitekturën, enterierin, akustikën, teknologjinë skenike, audio dhe video sistemet, instalimet termoteknike dhe elektrike, ose me një fjalë, ky institucion do të marrë një pamje krejtësisht të re e cila është e përafërt me ndërtimin e ri", theksoi kryeministri Gruevski.

Ai paralajmëroi edhe një teatër të ri në Tetovë për të cilin duhet të publikohet tender për ndërtim, ndërsa përmes partneritetit publik-privat në plan është edhe ndërtimi i ndërtesave të reja për Teatrin dramatik dhe të Tetarit Qendër në të cilin do të transferohet Tetari Komedia.

Zëvendëskryeministri Xhaferi theksoi se Teatri shqiptar është tempulli më i rëndësishëm i kulturës shqiptare në Maqedoni prandaj siç tha, nuk ka një institucion më meritor për një investim kapital si ky.

"Kjo do të kontribuojë për zhvillimin e mëtejmë të kulturës, veçanërisht të artit teatror të shqiptarëve në Maqedoni. Objekti i modernizuar i teatrit do të jetë stimul dhe motiv për punë më të suksesshme dhe më cilësore të aktorëve dhe do të kontribuojë për zhvillimin kulturor të shqiptarëve, por edhe për të gjitha kulturat në Maqedoni. Do të jetë edhe vlerë shtesë për të gjithë adhuruesit e teatrit dhe entuziazëm shtesë për tërë personelin e këtij institucioni", tha Xhaferi.

Ministrja e Kulturës, Elizabeta Kançeska-Milevska nënvizoi se ajo që është e rëndësishme të përmendet për ndërtesën që do të rikonstruohet është se është objekti i parë teatror në Shkup i ndërtuar pas tërmetit në vitin 1963.

"Teatri shqiptar la shenjë të rëndësishme për kulturën dhe historinë në Maqedoni dhe artistët e këtij teatri meritojnë të punojnë në kushte shumë të volitshme. Do të jetë objekt krejtësisht i ri. Objekti i vjetër do të rrënohet do të mbeten vetëm themelet dhe objekti do të ndërtohet mbi themelet kryesore të teatrit. Shpresoj se do të ruhet dinamika dhe në shtator të vitit të ardhshëm do ta hapim me shfaqje të re", deklaroi ministrja e Kulturës.

Për investimin u falënderua edhe drejtori i IP Teatrit shqiptar-Shkup Adem Karaga, sipas së cilit potenciali i aktorëve meriton hapësirë funksionale për të bërë shfaqje të cilat do të jenë në konkurrencë me teatrot në rajon dhe botë.

"Aktorët me premiera dhe shfaqje të shumta, çmime dhe mirënjohje dëshmuan se meritojnë një objekt të këtillë. Kjo skenë ka prodhuar mbi 300 premiera, mijëra shfaqje, ndërsa kjo sallë ka përjetuar duartrokitjet e dhjetëra mijëra shikuesve", tha Karaga.

Projektues i objektit të ri është Megaron-Inxhiniering SHPK Shkup, ndërsa zbatues i punimeve Lamone Moreda nga Italia. Derisa të zgjat rikonstruimi i plotë, ansamblet e teatrit shqiptar dhe atij turk do të punojnë në objektin e vjetër të Teatrit popullor të Maqedonisë si dhe në skenat e teatrove të tjera. /koha/
Shtuar më 11/01/2014, ora 14:45

Shkruani komentin tuaj!
Të fundit nga kjo kategori