Falsifikimi i dosjeve, kallëzim penal ndaj Hisen Musliut
Pëlqej
Ministria e Brendshme sot bëri të ditur se ka ngritur kallëzim penal kundër Hisen Musliut, 64 vjeç, ish-zyrtarit të lartë të shërbimit sekret, i përfshirë në aferën e falsifikimit të dosjeve.

Sipas MPB-së, Njësia për krim të organizuar ka ngritur kallëzimin penal për shkak të ekzistimit të dyshimeve të bazuar se ai ka kryer vepër penale duke shkelur nenin 36 të Kodit Penal, me rastin e fshehjes, ndryshimit, shkatërrimit dhe publikimit të dhënave në mënyrë të paligjshme. Në bazë të këtij neni, i akuzuari mund të dënohet me para apo me dënim prej një viti burg, në rast se do të shpallet me faj.

Ndaj Musliut, Gjykatësi hetues pranë Gjykatës së Shkupit ka shqiptuar masën e paraburgimit prej tetë ditëve.

Sipas policisë, i dyshuari gjatë muajit tetor të vitit 2010 ka hyrë në kontakt me një person nga Tetova, i cili i ka dhënë fillimisht një dosje dhe pas disa ditëve dhe 3 dosje, që përmbanin të dhëna për personalitete të jetës publike dhe politike në Maqedoni gjoja për bashkëpunimin me shërbimet e huaja sekrete dhe të ish-shërbimeve jugosllave. Musliu këto dosje i kishte dërguar në banesën e tij në Tetovëdhe pasi që i kishte skenuar, ai kishte bërë ndërhyrje, korrektime dhe ndryshim të të dhënave të dokumenteve. Ashtu që më pas, sipas MPB-së, dosjet e përpunuara me pseudonimet “Ibar” që ndërlidheshin me emrin e kreut të BDI-së, Ali Ahmeti dhe tre dosjet e tjera “Vujko”, “Strelec” dhe “Mama” i janë dorëzuar personit të njejtë, me qëllim të publikimit nëpër media dhe të dorëzohen pranë Komisionit për Lustrim, që edhe më pas kishte ndodhur.

“Në disa emisione, gjegjësisht media, ku ishin përmendur këto dosje, ishte transmetuar edhe një intervistë me personin Bozhidar Spasiq, shtetas serb, ish-zyrtar i shërbimit sekret jugosllav, i cili kishte dëshmuar për gjoja ekzistimin e këtyre dosjeve dhe pseudonimeve, duke konfirmuar se gjoja krerët e BDI-së kanë qenë bashkëpunëtor të ish-shërbimit sekret jugosllav”, theksojnë organet e rendit.

Sipas MPB-së, i dyshuari Musliu dhe Spasiq si ish-pjestarë të shërbimit sekret jugosllav janë njohur më shumë se 20 vite, kanë qenë në kontakte të rregullta, ndërsa këtë vit kishin intenisifikuar kontaktet dhe kishin realizuar disa takime në Serbi. Sipas dyshimeve të para, Spasiq duhej të vërtetonte dosjet se janë origjinale, me ç`rast ai në disa raste kishte përfituar nëpërmjet “Uestern Union” një vlerë prej 4.400 euro nga Musliu.

Policia gjatë bastisjes së shtëpisë së të dyshuarit ka gjetur shumë materiale të cilat ishin shfrytëzuar për falsifikimin e dosjeve.

Afera e dosjeve shpërtheu muajin e kaluar, kur pranë Komisionit të dosjeve dhe në disa media maqedonase u publikuan materiale për gjoja ekzistimin e dosjeve për kreun e BDI-së, Ali Ahmeti, Fazli Veliu dhe Musa Xhaferi, duke i konsideruar sipas këtyre dokumenteve si ish-bashkëpunëtor të sigurimeve shtetërore ish-jugosllave. Krerët e BDI-së mohuan këto dokumente duke i quajtur falsifikime dhe qëllime për rrënimin e imazhit të tyre dhe lëvizjeve politike dhe të U]K-ve gjatë dekadave të fundit. BDI akuzoi PDSH-në se ajo ishte e involvuar në publikimin e këtyre materialeve. I dyshuari Hisen Musliu, dje sipas organeve të rendit, ka pranuar se dosjet e kishte marrë nga PDSH-ja.
Shtuar më 24/11/2010, ora 19:36
Shkruani komentin tuaj!
Të fundit nga kjo kategori