Përpjekjet e Bashkimit Demokratik Shqiptar që shqiptarët të dalin të unifikuar në zgjedhjet e parakohshme parlamentare të 5 qershorit nuk kanë dhënë rezultat.
Në një deklaratë të BDSH-së thuhet se interesa individuale dhe të grupeve të caktuara mbizotërojnë mbi interesat e popullit shqiptar.

“Të përçarë si asnjë herë më parë, zgjedhjet e 5 qershorit do të përqendrojnë vëmendjen në luftën politike brenda shqiptare që pas këtyre zgjedhjeve të dalim edhe më të përçarë si shqiptarë. Pas përçarjes ekstreme të forcave politike shqiptare në vend, ku shqiptarët nuk janë bashkë as në dasma e as në varrime, strategjia antishqiptare e Shkupit ka përcaktuar si mision përçarjen e emigracionit shqiptar”, thuhet në kumtesë.


Duke qenë mirënjohës për kontributet e mëdha që kanë dhënë dhe që japin emigrantët shqiptarë, BDSH-ja dënon politikën antishqiptare që tenton të mbjell përçarje të reja ndërshqiptare dhe bën publik vendimin e vet se nuk do të bëhet pjesë e përçarjes së emigracionit shqiptar mbi baza partiake dhe nuk do të nxjerrë asnjë kandidat për diasporë, shkruan zhurnal.

BDSH-ja kërkon nga të gjithë shqiptarët e vetëdijshëm se përçarja e forcave politike dhe shoqërore shqiptare është strategji e qarqeve antishqiptare. /albeu.com/