Besimi zbulon propozimin e Nimicit: Është bazë për zgjidhje!
Propozimi i ndërmjetësit Metju Nimic është një bazë e mirë për të vijuar me bisedimet për zgjidhjen e kontestit të emrit.

Ky është vlerësimi i zëvendëskryeministrit për Çështje Evropiane, Fatmir Besimi, dhënë gjatë një interviste për Radion Evropa e Lirë.

Besimi ka deklaruar se, për zgjidhjen e emrit, edhe Greqia duhet të jetë më aktive, ndërsa ka kërkuar që me këtë çështje të mos merren vetëm institucionet e shtetit, por dhe i gjithë spektri politik në vend.

I pyetur se cili është propozimi që ka dhënë ndërmjetësi Nimic, Besimi ka thënë se është po i njëjti që ka përmendur dy javë më parë kreu i BDI-së, Ali Ahmeti, duke lënë për të kuptuar se propozimi i dhënë nga diplomati amerikan, është “Maqedonia e Veriut” ose “Maqedonia e Epërme”.

Nëse partneri i koalicionit, VMRO-DPMNE, ka “vesh” për të dëgjuar apelet e BDI-së për zgjidhjen e kontestit, Besimi është përgjigjur:

“Nëse flas nga pozita e partisë politike, BDI ka qenë përherë transparente dhe e hapur, dhe si brenda institucioneve, ashtu dhe në publik, ka qenë konsistente përsa i përket veprimit të saj politik. Lidhur me çështjet e rëndësishme shtetërore, dhe interesat shtetërore, BDI ka konfirmuar disa herë qëndrimin e saj se, interesave shtetërore duhet dhënë më shumë prioritet se interesave politike apo partiake”. /albeu.com/
Shtuar më 28/06/2013, ora 14:15

Shkruani komentin tuaj!
Të fundit nga kjo kategori