BE-Maqedonisë: S'ka datë për negociata
Pëlqej
Raporti i Komisionit Evropian, i kërkuar nga Këshilli Evropian, për vlerësim të ecurisë demokratike të Maqedonisë, që do të publikohet të nesërmen, nuk pritet të ketë surpriza. Mesazhet e BE janë të qarta: mungesa e reformave në sferën e gjyqësisë, në sferën e profesionalizimit të administratës publike, në realizimin e Marrëveshjes së Ohrit, përkeqësimi i marrëdhënieve ndëretnike, mosfunksionimi i Parlamentit dëmtojnë procesin e integrimit europian të Maqedonisë.

Bashkimi Evropian nuk do të jap dritën jeshile për çeljen e negociatave për anëtarësimin e Maqedonisë. mMaqedonia do të marrë kartonin e kuq të radhës për faktin se nuk ka arritur të zgjidhë kontestin e emrit me Greqinë si dhe nuk ka realizuar reformat e kërkuara nga Komisioni Evropian.

Ambasadori i BE-së në Maqedoni, Ervan Fuere ka thënë se në raportin vijues për rezultatet e arritura të Maqedonisë nga Komisioni Evropian do të theksohen sferat ku është arritur përparim, por do të ketë edhe sfera në të cilat do të theksohen dobësitë.

"Nuk mund të parashikoj se çka do të përmbajë raporti, por mendoj se do të theksohet përparim në disa sfera dhe mendim pozitiv për atë që është arritur. Do të theksohen edhe dobësitë në disa fusha në të cilat Qeveria duhet të fokusohet për shkak se ende nevojiten reforma dhe ka shumë punë që duhet të bëhet për prosperitet të qytetarëve", është shprehur Fuere. (ina)
Shtuar më 08/11/2010, ora 10:55
Shkruani komentin tuaj!
Të fundit nga kjo kategori