Askush përveç Gruevskit nuk kërkon zgjedhje të reja
Deri më tani asnjë parti politike përveç VMRO-DPMNE-së, nuk duan zgjedhje të reja parlamentare, njofton "Portalb.mk".

Zëdhënësi i BESA-s, Faton Fazliu, ka thënë se opsioni më i mirë është që të formohet Qeveri politike dhe të mos shkohet në zgjedhje.

"Ne vlerësojmë se duhet të shihen të gjitha mundësitë për krijimin e Qeverisë stabile politike, por nëse edhe atëherë nuk ka ndonjë rezultat, atëherë duhet të diskutojmë për atë temë", tha Fazliu për "A1on".

Ndërkohë, zëdhënësi i LSDM-së, Petre Shilegov, ka bërë me dije se nga kjo parti po presin që presidenti Gjorge Ivanov t'i dorëzojë mandatin për formimin e Qeverisë.

Nga Aleanca për Shqiptarët vlerësojnë se nuk ka nevojë për zgjedhje të reja. Sipas liderit të LR-PDSH-së, Ziadin Sela, partitë shqiptare nuk duhet të pranojnë zgjedhje, ndërkaq nëse ajo ndodhë, ata do t’i ftojnë të gjitha partitë shqiptare që t’i bojkotojnë të njëjtat.

Zëdhënësi i BDI-së, Bujar Osmani, të dielën pas mbarimit të mbledhjes tha se ende nuk është arritur marrëveshje për njërën nga 5 pikat që kryetari i partisë Ali Ahmeti i ka ofruar si opsione për dalje nga kriza, ndërkaq njëra prej tyre është edhe mbajtja e zgjedhjeve të parakohshme parlamentare. /albeu.com/
Shtuar më 31/01/2017, ora 15:57

Shkruani komentin tuaj!
Të fundit nga kjo kategori