Aleanca dhe BESA dorëzojnë firmat në LSDM
Aleanca për Shqiptarët dhe Lëvizja Besa, kanë dorëzuar firmat e deputetëve të tyre kreut të LSDM-së Zoran Zaevit.

Kreu i LR PDSH-së Zijadin Sela, para fillimit të Kuvendit Qendror të Aleancës në një deklaratë për "Alsat-M" tha se janë të gatshëm të marrin përgjegjësi në qeveri, por u shpreh kategorik se pa plotësimin e pikave të platformës së partive shqiptare Aleanca nuk do të bëhet pjesë e ekzekutivit.

"Pjesëmarrja jonë në qeveri është e kushtëzuar me platformën tonë politike. Sepse realisht çfarë kuptimi do të kishin zgjedhjet dhe qeveria nëse ne do të bëheshim pjesë e një qeverie ku do të zbatohen platformat dhe programet e partive tjera.

Një ndër kushtet kryesore është ligji për gjuhën, zbardhja e proceseve të montuara politike, dekriminalizimi i kësaj shoqërie dhe institucioneve dhe kuptohet zhvillimi ekonomik me qëllim që të ndalim shpërnguljen e cila është e madhe në mesin e popullatës në Maqedoni.

Prandaj nuk do të hyjmë në qeveri sa për të qenë kukull, por do të hyjmë në momentin që do të plotësohen kushtet që i kemi parashtruar", ka thënë Sela.

Ndërkohë informacionet se Aleanca për Shqiptarët nënshkrimet i ka kushtëzuar edhe me poste ministrore, Sela i quajti spekulime.

Aleanca për Shqiptarët së fundi ka zhvilluar edhe bisedime me grupet e punës të BDI-së dhe LSDM-së. Në zgjedhjet e 11 dhjetorit, Aleanca për Shqiptarët fitoi 3 mandate deputetësh. /albeu.com/
Shtuar më 26/02/2017, ora 15:13

Shkruani komentin tuaj!
Të fundit nga kjo kategori