Von der Leyen njofton raundin e 10-të të paketës së sanksioneve kundër Rusisë

Presidentja e Komisionit Evropian, Ursula von der Leyen, njoftoi sot nga Kievi se Bashkimi Evropian po planifikon raundin e 10-të të sanksioneve kundër Moskës me rastin e përvjetorit të pushtimit të Ukrainës, më 24 shkurt.

“Më 24, saktësisht një vit pas fillimit të pushtimit, ne planifikojmë të vëmë në fuqi paketën e dhjetë të sanksioneve”, tha ajo në një konferencë të përbashkët për shtyp me presidentin ukrainas Volodymyr Zelensky.

“Sot Rusia po paguan një çmim të rëndë, sepse sanksionet tona po gërryejnë ekonominë e saj,” tha ajo, ndërsa Brukseli ka miratuar një breshëri sanksionesh për gati një vit për të frenuar të ardhurat e Moskës.

Ndër masat ndaj Rusisë është edhe tavani i çmimit të naftës ruse për eksport në 60 dollarë.

Sipas Von der Leyen, tavani i vendosur në fillim të dhjetorit nga BE, Grupi i Shtatë vendeve më të zhvilluara të industrializuara (G7) dhe Australia, “tashmë po i kushton Moskës rreth 160 milionë euro në ditë”.

Në fillim të dhjetorit, BE vendosi gjithashtu një embargo ndaj naftës bruto ruse të transportuar nga deti. Kjo do të shtrihet nga e diela në tregun e produkteve të naftës të rafinuar ruse dhe vendet e G7 do të vendosin gjithashtu një tavan në çmimin e këtyre produkteve.

Për më tepër, në përgjigje të një pyetjeje në lidhje me përpjekjet e fundit për të luftuar korrupsionin në Ukrainë, një çështje kritike për vendin e kohës së luftës dhe anëtarësimin e tij të ardhshëm në BE, Ursula von der Leyen, me Volodymyr Zelensky në krah, përshëndeti reagimin “të shpejtë politik.”

Nga ana e tij, Volodymyr Zelensky kërkoi vendosjen e më shumë sanksioneve nga BE kundër Rusisë. Presidenti ukrainas vlerësoi se shpejtësia e fushatës së sanksioneve evropiane kundër Rusisë është “ngadalësuar pak” dhe se ajo duhet të forcohet./Albeu.com/

 


Shtuar 2.02.2023 16:26