Një aksident i rëndë trafiku ka ndodhur në fshatin Stençe. Nga devijimi i rrugës një automjet ka përfunduar në shtratin e lumit “Vardar”, raporton korrespondenti i gazetës KOHA nga Gostivari. Si pasojë, drejtuesit i automjetin ka gjetur vdekjen në vend të ngjarjes. Bëhet fjalë për 36 vjeçarin Ejup Rexhepi nga Reçica e Madhe e Tetovës. Shoqëruesi, një bashkëvendës i tij i moshë 21 vjeçare ka pësuar lëndime serioze.

Kalimtarët e rastit kanë arritur ta nxjerrin nga automjeti i aksidentuar dhe me shenja jete është bartur në Spitalin Klinik të Tetovës, nga ku vazhdon mjekimi intensiv i tij. Policia njofton se rasti ka ndodhur të mërkurën rreth orës 8, në afërsi të urës që mban emrin e fshatit Stençe.

“Automjeti i markës “Mercedes E - Clasa” me regjistrim të Gjermanisë, deri tash për arsye të panjohura dhe rrethana ende të pazbardhura, para urës së fshatit ka devijuar nga rruga dhe ka përfunduar e përmbysur në ujërat e lumit. Drejtuesi i automjetit, E.R. (36) nga Reçica e Madhe, ka pësuar lëndime nga të cilat ka ndërruar jetë në vendin ku dhe ndodhi ngjarja, kurse shoqëruesi i tij, B.A (21) nga i njëjti fshat, i cili më pas ishte nxjerr nga automjeti, në gjendje të pavetëdijshme por me shenja jete, është bartur në Spitalin Klinik të Tetovës”, vuri me dije zëdhënësi i policisë regjionale të Pollogut, Marjan Josifoski.

Pas njoftimit me rastin, ekipe të policisë, gjykatësit hetues dhe prokurorisë kanë dal në vendin e ngjarjes. Automjeti i aksidentuar është transferuar në hapësirat e Sektorit të Punëve të Brendshme në Tetovë, ndërkaq me kërkesë të gjykatësit hetues trupi i pajetë do t’i nënshtrohet obduksionit. /albeu.com/