Ahmeti kërkon negociata me ndërhyrjen e Brukselit
Pëlqej
Në ditën e dytë të vizitës në Bruksel, kryetari i Bashkimit Demokratik për Integrim, Ali Ahmeti zhvilloi takime me Drejtorin Menaxhues të Shërbimit të Jashtëm dhe të Sigurisë për Evropë dhe Azi, z. Luis Felipe Fernandez De La Penja, Drejtorin për Evropën Perendimore, Ballkanin Perendimor dhe Turqinë, z. Fernando Xhentilini, si dhe Deputetin në Parlamentin e Evropës nga partitë e djathta, z. Eduard Kukan.

Në të gjitha takimet u diskutua për ardhmërinë Europiane të Maqedonisë dhe gjetjen e mënyrës më të mirë për zhbllokimin e proçesit integrues për të vijuar me negociatat për anëtarësim. Ahmeti foli për shfrytëzimin e përvojës së mirë të negociatave midis Prishtinës dhe Beogradit edhe në rastin e Shkupit dhe Athinës.

Ai përgëzoi autoritetet e lartpërmendura për suksesin në arritjen e marrëveshjes midis Kosovës dhe Serbisë dhe theksoi që pikërisht një angazhim i tillë nevojitet edhe në rastin e zgjidhjes së çështjes së emrit. “Kjo pengesë po mban peng ardhmërinë e Maqedonisë dhe të qytetarëve të cilët presin zgjidhje dhe integrim dhe nuk duan izolim”,-mësohet të ketë thënë ai.

Përfaqësuesit e lartë të Bashkimit Evropian theksuan mbështetjen për aspiratat Europiane të Maqedonisë duke shprehur bindjen që zgjidhja është e mundur në rast se ekziston vullneti politik dhe gatishmëria tek politikanët në të dy vendet për zgjidhje. Brukseli inkurajon zgjidhje sa më të shpejt të kontestit Greqinë. Në takimin me Kukan, u fol për mbështetjen që PE ka dhënë për Maqedoninë.
Shtuar më 02/10/2013, ora 17:06
Shkruani komentin tuaj!
Të fundit nga kjo kategori