Falë blogjeve të panumërta dhe faqeve të internetit pikërisht për këto probleme, po ashtu falë edhe ndërgjegjësimit më të madh nga ana e konsumatorëve, po tregohemi gjithmonë e më të kujdesshëm ndaj përbërësve të produkteve që përdorim çdo ditë. Në fakt shumë e dinë që substancat e pranishme te larësit dhe produktet kozmetike, përveçse rasteve shumë të rralla, janë shumë larg nga të qenët biologjikë, pra të përbërë nga elemente natyrale dhe ekologjike (jo të dëmshëm për ambientin). Përveç problemit të lidhur me atë çka ato përmbajnë, shfaqet edhe një problem tjetër, ai ekonomik: produktet për higjienën e shtëpisë apo atë personale janë gjithmonë shumë të shtrenjta. Për këtë arsye, produktet e përgatitura vetë në shtëpi po zënë gjithmonë e më shumë terren. Njerëzit po preferojnë të krijojnë në shtëpi produkte me substanca biologjike që respektojnë natyrën, lëkurën dhe portofolin. Ja disa prej produkteve që ne përdorim çdo ditë e që mund të përgatiten vetë në shtëpi.

Shampo me argjile dhe miell qiqrash
Shampot që gjenden në treg janë të mbushura me përbërës sintetikë apo yndyra të dala nga rafinerimi i naftës (petrolate): këto shkaktojnë iluzionin e një floku të pastër e të shndritshëm, ndërsa nga brenda ai mbetet i thatë dhe i dobët. Për më tepër me këto lloj shamposh rrezikohet ndryshimi i ekuilibrit në lëkurën e kokës që mund të reagojë në mënyra të ndryshme duke u acaruar.

Ja një shampo bio e bërë në shtëpi me përbërës kryesorë argjilën dhe miellin e qiqrave. Argjila bën që flokët të jenë të pastër, ndaj është shumë e këshillueshme për flokë me yndyrë që priren për t’u larë më shpesh.

Përbërësit
Ujë i ngrohtë (jo duke zier)
Miell qiqrash
Vaj lini
Argjile e bardhë ose jeshile
Vaj esencial me limon

Përbërja që do të formohet nga bashkimi i këtyre elementeve duhet përdorur menjëherë: nëse doni ta ruani për më gjatë duke i shtuar konservues më pak agresivë nga ato që përdoren te shampot që gjenden në treg, mund t’i gjeni në faqet online ose në farmaci.

Pasta e dhëmbëve
E domosdoshme për të gjithë prestarët e familjes, një pastë e mirë dhëmbësh nuk duhet të jetë patjetër ajo që dentistët rekomandojnë, por mund të përgatitet në shtëpi me shumë pak ingredientë bazë. Më e domosdoshmja argjila jeshile: gjendet pothuajse në çdo supermarket dhe është ekonomike, antitoksike i pastron dhëmbët dhe i dezinfekton ata. Do të na duhet mendërz e mëllagë, gjethet e së cilës përdoreshin në antikitet për të pastruar dhëmbët. Po ashtu listës mos harroni t’i shtoni pak sodë dhe ujë të distiluar.

Maskë ushqyese për flokët
Ashtu si te shampot, përbërësit e ndryshëm kimikë që gjenden te produktet për flokët mund t’i dëmtojnë ata lehtësisht në vend që t’i ndihmojë dhe shkëlqejë. Për të hidratuar flokët, mbi të gjitha flokët e gjatë, mund të përdoret një maskë e përbërë nga ingredientë natyralë shumë të ushqyeshëm dhe aspak të dëmshëm.

Përbërësit
1 lugë vaj ulliri
1 një lugë vaj bajameje
1 lugë vaj lini
1 lugë vaj jojoba
2 lugë mjaltë
1 lugë lëng limoni
1 vezë

Për të krijuar një maskë mjafton që t’i hidhni të gjithë ingredientët në një kuti dhe t’i përzieni mirë. Aplikojeni në të gjithë flokun dhe lëreni për 20-30 minuta. Pastaj lajini flokët me shampo. Flokët tuaj do të jenë më të shndritshëm dhe më të hidratuar se kurrë. Ndërkohë që me pak vaj jojobe dhe susami mund të përgatitet një krem shumë i mirë për fytyrën. /shqip/