Ja pyetjet më të shpeshta që meshkujt u bëjnë mjekëve
Janë shumë të turpshëm kur vjen fjala që duhet të dalin para mjekut dhe të rrëfejnë frikërat që kanë për shëndetin, apo qoftë edhe shqetësimet dhe ankthet që mund t’i kenë shqetësuar prej kohësh. Nga një studim i bërë së fundi del se meshkujt, ndryshe nga femrat, e kanë shumë problem që të shkojnë te mjeku për kontrolle të rregullta dhe kur ndodh që duhet të shkojnë të nxitur nga ndonjë sëmundje, ata e kanë të vështirë që të hapen me të. Rastet janë të shumta, por gjithsesi ka të bëjë edhe me një lloj ndrojtjeje të brendshme burrërie, që prek meshkujt dhe i bën hermetikë dhe të largët me botën mjekësore. Gratë, në të kundërt, shkojnë shumë më shpesh te mjeku, edhe për vizitat rutinë dhe kjo ka bërë që të kenë edhe më shumë rezultate të mira në çështjet shëndetësore dhe mbi të gjitha, në ato që kanë të bëjnë me riprodhimin. Edhe të dhënat flasin për një jetëgjatësi më të madhe të grave krahasuar me meshkujt në shumë vende të botës. Megjithatë ka mjekë që tashmë mund të thonë fare mirë se cilat janë disa nga pyetjet që u bëhen më shumë. Bëhet fjalë për pyetje edhe të çuditshme, që mund të kenë të bëjnë me mite urbane, apo me frikëra personale nga e shkuara e tyre. Ajo që të bie në sy është se një numër i madh pyetjesh që bëjnë meshkujt para mjekut lidhet me organin riprodhues, edhe pse ka edhe tematika të tjera pyetjesh. Ja disa prej tyre dhe përgjigjja që u ka dhënë një mjek britanik dhe që sigurisht vlejnë për të gjithë meshkujt dhe dilemat e tyre të brendshme.

Si mund të ndaloj që të djersitem në një takim me të dashurën?

Ka disa arsye që shkaktojnë djersitjen e shpeshtë në trupin e njeriut. Nëse nuk ju bën punë produkti antidjersë që përdorni, pasi sasia e djersës është më e madhe, atëherë zgjidhja do të ishte kloridi i aluminit. Për këtë duhet që të pyesni farmacistin, i cili do t’ju japë edhe dozën e duhur. Duhet ta dini se ka një përdorim specifik, por ama është shumë i mirë për të ndaluar çdo lloj djersitjeje. Ndërsa në aspektin psikologjik do t’ju këshillohej që të qetësoheshit emocionalisht, të shtensionoheshit dhe ta merrnit gjithçka shtruar. Mos u ndjeni se duhet folur në çdo moment dhe bëjini pyetje vajzës që keni takuar, për t’i dhënë asaj mundësi që të flasë dhe vetes mundësi që të pushoni.

Cili është ushqimi më i mirë për të ngrënë gjatë një takimi dashurie, për të mbajtur energjinë në nivele të larta dhe për të penguar përgjumjen?

Zakonisht është teprimi me alkoolin që shkakton edhe probleme me energjinë. Gjëja më e mirë është që të shijohet ushqimi deri në fund, por jo me tepri dhe nuk ka rëndësi se çfarë duhet të zgjedhësh veçanërisht. Unë rekomandoj se mbase do të ishte mirë që në fund të pinit një kafe të fortë, për të mbajtur energjinë dhe gjumin larg dhe më pas, të bënit një shëtitje të shkurtër romantike jashtë diku në një park, duke e lënë erën që t’ju përkëdhelë.

Nëse qëllohem nga një plumb, është më mirë ta nxjerr atë, apo ta lë në vend për shkak se mund të kem hemorragji?

Absolutisht që plumbi duhet lënë aty. Duket gjetur një kirurg i zoti dhe një anestezist për ta nxjerrë atë, sepse vetë mund të dëmtohesh.

A mund të më dëmtojnë shanset për t’u riprodhuar një palë të mbathura banje të ngushta?

Ky është një mit i hasur shpesh. Shumë i zakonshëm tani. Nëse rritet temperatura rreth organit tuaj, mund të ndikojë në cilësinë e spermës dhe deri më sot, ka disa prova që faktojnë dhe mbështesin se mbathjet e ngushta mund të dëmtojnë cilësinë e spermës, por gjithsesi nuk është provuar aspak se mund të ndikojnë në mënyrë të drejtpërdrejtë në fertilitetin e mashkullit, ndaj mos u shqetësoni, por më mirë të tregoheni të kujdesshëm.

Cilat janë shanset që gruaja ime kur të plaket të ketë pamjen e mamasë së saj, edhe pse ajo tani është shumë elegante dhe me trup të bukur, ndërkohë që e ëma është e shëndoshë dhe lluqe?

Gjenet janë shumë të ndërlikuara dhe gjenetika është një fushë e zbuluar shumë pak deri më tani, me gjithë progresin e bërë dhjetë vitet e fundit. Edhe nëse arrin që të trashëgosh gjysmën e gjeneve nga ana e babait, shanset nuk janë kurrë 50 me 50. Varet nga mënyra se si personi i merr dhe i shfaq gjenet e trashëguara nga të dy prindërit. Pra, nëse gruaja juaj ka shumë gjene nga ana e babait, ajo do të duket si ai dhe nëse ka shumë gjene si të mamasë, do të ngjajë si ajo. Por nuk mund të jesh kurrë i sigurt se si do të duket një grua e re në një moshë të avancuar.

Nëse unë zihem me dikë, apo vrapoj me shpejtësi, çfarë është ajo lloj shijeje si prej metali që ndjej në gojë?

Kam dëgjuar njerëz që të flasin për një gjë të tillë dhe të thonë se ndoshta është shija e adrenalinës, sepse kur vrapon, ose je duke u përballur fizikisht me ndonjë njeri, ke një sasi më të madhe adrenaline se zakonisht. Por mendoj se ka më shumë mundësi që të jetë shija e gjakut ose më mirë e hekurit që ndodhet në gjak, sepse në situata të tilla goja pëson disa çarje të vogla, nga të cilat rrjedh gjak.

Nëse do të bëj synet tim bir, a do t’i shkaktojë kjo ndonjë problem në gjatësinë e organit seksual?

Jo. Kjo nuk ka të bëjë fare.

A është i mundur transplanti i organit seksual?

Po. Transplanti i parë i organit seksual të mashkullit është bërë në Kinë disa vjet më parë dhe në atë kohë është konsideruar si një sukses. Megjithatë u tha ndërkohë se personit ia hoqën sërish organin pas disa javësh, sepse kishte një problem shumë të madh psikologjik dhe një reagim që askush nuk e priste. Ka shumë mundësi që ai të mos e ketë ndjerë atë dhe ndoshta ka pasur probleme edhe me të shoqen.

A duhet të shqetësohem nëse shkoj të urinoj më shumë se tri herë gjatë natës?

Tri herë tingëllon pak si shumë dhe nëse je një djalë i ri, mund të jetë një indikacion për një problem të mëtejshëm me prostatën, ndaj është mirë që të shkosh të vizitohesh te mjeku.
Shtuar më 28/08/2011, ora 11:47
Shkruani komentin tuaj!
Të fundit nga kjo kategori