Komisioni Qendror i Zgjedhjeve ka përfunduar hapjen e kutive dhe numërimin e votave të kontestuara të hedhura në kutitë e gabuara në njësinë bashkiake nr. 3 në Tiranë, duke përmbyllur procesin për tre minibashki të Tiranës.

Gjatë pasdites së sotme u numëruan 117 kutitë e 32 qendrave të votimit të minibashkisë nr. 3, pasi 11 kuti ishin numëruar në procesin e mëparshëm në KQZ.

Gjatë procesit të numërimit rezultuan 20 vota të kontestuara në favor të kandidatit të koalicionit “Aleanca për Qytetarin” Lulzim Basha, dhe 36 vota për kandidatin e koalicionit “Aleanca për të Ardhmen” Edi Rama.

Tashmë diferenca mes dy kandidatëve është ulur, dhe Lulzim Basha është në avantazh me 76 vota para, kundrejt rivalit të tij Edi Rama. /albeu.com/