PS, sot vendos për bojkotin
Partia socialiste do të mbledhë mesditën e të shtunës Asamblenë e Përgjithshme.
Burime nga PS-ja thanë se pritet të dilet me një paketë të strategjisë së aksionit të opozitës në rast se kandidati i mazhorancës, Lulzim Basha shpallet fitues për Bashkinë e Tiranës, kur vetëm katër ditë na ndajnë nga vendimi i Kolegjit Zgjedhor për këtë çështje.

Mësohet gjithashtu se kryetari i PS-së, Edi Rama do të kërkojë nga të gjithë deputetët dhe përfaqësuesit e Asamblesë që të japin qëndrimin e tyre për situatën aktuale.

Një çështje e rëndësishme që do të diskutohet në mbledhjen e Asamblesë është edhe qëndrimi që do të mbajë PS-ja në lidhje me parlamentin e Shqipërisë.
Bojkoti i nisur nga kjo parti pas zgjedhjeve të 8 majit ka hasur në kundërshtimin e disa deputetëve socialistë të cilët mendojnë që PS-ja duhet të marrë pjesë intensivisht në punimet e parlamentit, për të dhënë kontributin e të majtës për shumë çështje që janë në diskutim.

Pika tjetër që pritet të diskutohet janë edhe vetë marrëdhëniet mes deputetëve dhe përfaqësuesve të PS-së, të cilët nëpërmjet rrjeteve joformale si facebook kanë shprehur qejfmbetje në marrëdhëniet me njëri-tjetrin, kryesuar nga Erjon Braçe i cili ka akuzuar disa ka akuzuar disa bashkëpunëtorët e tij deputetë për qëndrime jonormale ndaj deklaratave të tij, raportoi e përditshmja Shqip.
Shtuar më 02/07/2011, ora 09:04

Shkruani komentin tuaj!
Të fundit nga kjo kategori