Kryeprokurori largohet i zhgënjyer
Kryeprokurori në largim i EULEX-it, Johannes Van Vreeswijk, pranon se do të largohet nga misioni me zhgënjimin se nuk e ka kryer punën ashtu siç ka menduar.
Gjërat i kanë dalë më të komplikuara dhe proceset i janë zgjatur më shumë se që ka menduar dhe ka dëshiruar.

“Pritjet e mia kanë qenë që gjërat mund të shkojnë më shpejt. Mirëpo, nuk ka qenë kaq e thjeshtë sa unë kam menduar se do të jetë”, thotë ai. Një javë para përfundimit të punës si kryeprokuror i EULEX-it, Vrewsijk në një intervistë për “Zërin” pohon se po largohet nga misioni që ka shërbyer nga 2008-ta, por jo edhe nga Kosova.

Ai thotë se po largohet nga misioni, sepse po i përfundon kontrata dhe se kohëzgjatja e mandatit të tij thotë se është arritur në kuadër të një marrëveshje që ka bërë shefi i EULEX-it, Xavier Bout de Marnhac dhe Brukseli.

Fjalët e mëdha që i kishte dhënë më se një vit më parë kur ishte në cilësinë e ushtruesit të detyrës së kryeprokurorit, kohë në të cilën ishte bastisur Ministria e Transportit dhe Postë Telekomit të Kosovës dhe vendbanimet e ministrit Limaj thotë se mund t’i thotë edhe tashmë.

Mirëpo, tashmë ka ndryshuar strategjinë. Nuk preferon të fl asë për raste konkrete ngase i largohet përgjegjësisë. Ai thotë se është bërë një keqkuptim, ngase asnjëherë nuk ka qenë prokuror në rastin Limaj. Janë dy prokurorë të tjerë që, sipas tij, janë duke punuar në dy raste të ndara për Limajn: për korrupsion dhe krime lufte.

Sipas Vreswijk, është në duar të prokurorëve të rasteve që të vendosnin kur do të ngrenë aktakuzat.

Ai pranon se në prill të 2010 ka pasur një lloj ndikimi politik me deklaratat e politikanëve kosovarë. Pranon gjithashtu se i kanë shkuar persona në zyrë për t’i thënë ta bëjë këtë apo ta bëjë atë, por thotë se ndikim nuk ka pranuar të ketë asnjëherë, e një gjë të tillë thotë se nuk e ka pasur as nga shefi i tij.

Publiciteti që i është krijuar me rastin Limaj, ai thotë se në një mënyrë i ka ndihmuar ngase pas rastit atë e kanë vizituar ministra e drejtorë, duke i ofruar video e fotografi për të bëmat e të tjerëve. /Zëri/
Shtuar më 25/06/2011, ora 10:21
Shkruani komentin tuaj!
Të fundit nga kjo kategori