Ky Ferrari fantastik është braktisur nga i zoti në një parking të qytetit të Emirateve të Bashkuara Arabe rreth dy vjet më parë dhe nuk është kthyer më për ta marrë.
Tani policia e ka nxjerrë në ankand me vlerë 1 milionë dollarë.

“Makina po kërkohej nga Interpoli dhe në fund u detyruam ta merrnim sepse kishte 20 muaj që rrinte e parkuar”, thotë për ‘Daily Mail’ Mohammed Saif Al Zaffin, drejtor i departamentit të trafikut.

Sipas tij, në Dubai policia mund të sekuestrojë çdo makinë që qëndron e parkuar për 6 muaj radhazi. Pronarët nuk kthehen të marrin makinat e tyre për të mos përfunduar në burg sepse mospagimi i gjobave konsiderohet krim në shtetin arab.

Ky Ferrari nuk është e vetmja makinë luksoze që është sekuestruar nga policia. Do të jenë 3 makina të tjera Ferrari, 7 Porsche dhe nga një makinë Corvette, Mercedes, BMW e Range Rovers.