Gabon në abort, mjeku detyrohet të "rrisë" fëmiun
The Guardian raporton se një mjek spanjoll është urdhëruar me vendim të një gjykate që të paguajë për rritjen e një fëmije, pasi një operacion i dështuar abortimi ka bërë që nëna e foshnjës të detyrohet ta çojë deri në fund shtatzëninë e saj.

Në një rast vërtet unik, një gjykatë në Palma de Majorka e ka urdhëruar mjekun e paidentifikuar që të paguajë gati 1.000 euro në muaj për mbështetjen financiare të fëmijës derisa ai të bëhet 25-vjeçar.

“Kurrë më parë nuk ka pasur një rast të këtillë në Spanjë”, ka thënë Eva Munar, avokate e nënës 24-vjeçare. “Ne nuk e dimë nëse ka pasur rast të ngjashëm diku tjetër në botë”.

Djali është lindur në tetorin e vitit 2010, gjashtë muaj pasi nëna e tij kishte shkuar për të bërë një abort në klinikën “Emece” të qytetit. Operacioni ishte kryer kur nëna ishte gati në javën e gjashtë të shtatzënisë.

Mjeku i kishte thënë asaj dy javë më vonë se skaneri kishte konfirmuar se ajo më nuk ishte shtatzënë. Në vendimin e tij, gjyqtari Francisco Perez ka thënë se mjeku nuk i kishte kushtuar pothuajse fare vëmendje skanimit, ndonëse avokatja e të dëmtuarës, Munar, ka thënë se klinika nuk ka nxjerrë një kopje të skanimit.

“Skanimi ka zgjatur tre minuta dhe më pas kam shkuar”, ka treguar nëna. “Më është thënë: ‘Je mirë, shko dhe vazhdo jetën si normalisht’”. Ajo është kthyer për një vizitë në klinikë pas tre muajsh, vetëm pasi i është mbushur mendja se ka mbetur shtatzënë përsëri.

Por, një skanim i ri ka zbuluar se bëhej fjalë për shtatzëninë e mëparshme. Ajo tashmë ishte në muajin e saj të gjashtë të shtatzënisë, dhe e kishte kaluar afatin e 22 javëve gjatë të cilave një femër mund të abortojë. “Jam këshilluar dhe më është thënë se do të ishte krim po të abortoja në atë fazë”, ka treguar nëna, e cila ka mbetur shtatzënë pa dashje.

Njëzetekatërvjeçarja, e cila e kishte fshehur shtatzëninë e saj nga familja për shkak të frikës se ata nuk do ta prisnin mirë lajmin, është detyruar t’ua tregojë atyre të gjitha. Ajo dhe fëmija e saj tani jetojnë bashkë me ta. Përkundër faktit se një teknikë thithëse është përdorur në përpjekje për të hequr embrionin, djali është lindur shëndosh dhe pa të meta.

Nëna e re, më pas, e ka paditur mjekun për dëmet, ndërsa gjykata i ka mundësuar asaj 150.000 euro dëmshpërblim. Gjykata gjithashtu ka vendosur se mjeku dhe siguruesi i tij duhet të paguajnë 978 euro në muaj për 25 vjet rresht për rritjen e fëmijës.
Shtuar më 27/05/2012, ora 18:29

Shkruani komentin tuaj!
Të fundit nga kjo kategori