Ekipi gjerman i emergjencës shpëton miun e ngujuar
Në qytetin gjerman të Bensheimit, punëtorët e ekipeve të emergjencës morën një thirrje të pazakontë. Një mi i shëndoshë ishte ngujuar në njërën nga vrimat e kapakut të kanalizimit.

“Ky mi si duket ka shtuar peshë gjatë dimrit dhe është bllokuar në këtë vrimë. Nuk ka mundur të lëvizë përpara apo prapa”, tha Michael Sehr, anëtar i ekipit për shpëtimin e kafshëve. “Edhe kafshët që urrehen nga shumë njerëz meritojnë respekt”, shtoi ai.

Në vendin ku ishte bllokuar miu fillimisht kishte arritur një vullnetar i ekipeve të shpëtimit, por ai nuk kishte mundur ta largonte kapakun e metaltë, prandaj kërkoi ndihmë nga kolegët, të cilët erdhën të pajisur me mjetet e duhura.

Pas publikimit të fotografive në rrjetet sociale, shumë përdorues të internetit e kanë lavdëruar punën e shpëtimtarëve për ta mbrojtur miun. Një vajzë e vogël që e para e kishte parë miun e ngujuar ia ka dhuruar një vizatim punëtorit që e shpëtoi atë. Në vizatim ajo e ka paraqitur miun me shumë zemra rreth tij, shkruan “BBC”. /albeu.com/
Shtuar më 26/02/2019, ora 23:22
Shkruani komentin tuaj!
Të fundit nga kjo kategori