BBC njofton se disa vandalë kanë dhunuar memorialin e Holokaustit Yad Vashem në Jeruzalem me grafiti ku denoncohet sionizmi.

Një prej sloganeve të shkruara në muret e memorialit lexonte: “Nëse Hitleri nuk do kishte ekzistuar, sionistët do e kishin shpikur atë”.

“Ky akt i paprecedent kalon vijën e kuqe,” tha drejtuesi i Yad Vashem, Avner Shalev.

Dyshimet për sulmin kanë rënë mbi hebrenjtë ultra-ortodoksë, të cilët kundërshtojnë krijimin e shtetit të Izraelit.

Shalev pranoi se një prej sloganeve kishte nënshkrimin e ultra-ortodoksëve.

Në një slogan tjetër lexohej: “Faleminderit Hitler për Holokaustin që organizove për ne. Falë teje ne kemi një shtet nga OKB”.

Disa hebrenj ultra-ortodoksë besojnë se një shtet hebre mund të ngrihet vetëm pas mbërritjes së Mesias dhe se shteti i Izraelit është ilegjitim.

Yad Vashem u ngrit në vitin 1954 dhe përkujton gjashtë milion hebrenjtë e vrarë nga nazistët.