Presidenti kroat del kundër NATO-s: Mos e furnizoni Ukrainën me armë

Presidenti i Kroacisë, anëtare e NATO-s, mbrëmë kritikoi vendet perëndimore për furnizimin e Ukrainës me tanke të rënda dhe armë të tjera në fushatën e saj kundër forcave pushtuese ruse, duke thënë se këto dërgesa të armëve vetëm do ta zgjasin luftën.

Associated Press raporton se Zoran Milanović u tha gazetarëve në kryeqytetin kroat se është “çmendur” të besosh se Rusia mund të mposhtet në një luftë konvencionale.

“Unë jam kundër dërgimit të ndonjë arme vdekjeprurëse atje. Kjo e zgjat luftën”, tha Milanović.

“Cili është qëllimi? Shpërbërja e Rusisë, ndryshimi i qeverisë? Flitet gjithashtu për copëtimin e Rusisë. Kjo është çmenduri”, shtoi ai.

Milanović ka kundërshtuar hapur pranimin e Finlandës dhe Suedisë në NATO, si dhe trajnimin e trupave ukrainase në Kroaci, si pjesë e ndihmës së BE-së për vendin e luftuar.

Dje ai tha se beson se Krimea nuk do të jetë më kurrë pjesë e Ukrainës. Gadishulli i Detit të Zi u aneksua nga Rusia në vitin 2014 në një lëvizje që nuk njihet gjerësisht ndërkombëtarisht. /albeu.com


Shtuar 31.01.2023 08:54